استاناداعى جەڭىل رەلستى ترامۆاي جەلىسىنىڭ نۇسقالارى تالقىلانۋدا

استانا. قازاقپارات - استانا قالاسىنىڭ اكىمى اسەت يسكەشەۆ ەلورداداعى جەڭىل رەلستى ترامۆايدىڭ جايى تۋرالى ايتىپ بەردى، دەپ حابارلايدى قازاقپارات ءتىلشىسى.

شاھار باسشىسىنىڭ سوزىنە قاراعاندا، قازىرگى ۋاقىتتا جەڭىل رەلستى ترامۆايدىڭ باعىتىن قاي جاقتا ۇزارتۋ كەرەكتىگى تۋرالى ماسەلە تالقىلانۋدا. ءبىر نۇسقا بويىنشا، جەلىنى قابانباي باتىر داڭعىلى بويىنشا تىكە تارتىپ، ودان ارى تۇران ارقىلى «سارىارقا» ساۋدا ورتالىعى، «كەرۋەن- سيتي» جاققا جەلى جالعاسۋى مۇمكىن. تاعى ءبىر نۇسقا نەگىزىندە جەڭىل رەلستى ترامۆاي قالالىق ساياباق ارقىلى وڭ جاعالاۋعا ءتۇسىپ كەتۋى ىقتيمال.

سونىمەن بىرگە، LRT قۇرىلىسىن جاڭا تەمىر جول ۆوكزالىنان باستاپ، ابىلاي حان داڭعىلى ارقىلى ەسكى ۆوكزالعا تارتۋ جوسپارى دا بار.

«مەنىڭ ويىمشا، وسى كۇزدە ءبىز ماماندارمەن بىرلەسە وتىرىپ، قاي جاققا قاراي جولاۋشىلاردىڭ اعىنى كوپ ەكەنىن زەرتتەيتىن بولامىز. سودان كەيىن عانا ينۆەستورلار بويىنشا ۇكىمەتپەن پروتسەدۋرالاردى تالقىلايمىز»، - دەيدى اسەت يسەكەشەۆ.

سونىمەن بىرگە، اكىم قۇرىلىستىڭ بەس اۋدانى بويىنشا قالانىڭ ەسكى بولىگىن رەيننوۆاتسيالاۋ جۇمىسى جوسپارلانىپ وتىرعانىن اتاپ ءوتتى.

«ونىڭ اياسىندا ءبىز كوشەلەردى كەڭەيتەتىن بولامىز. العاشقى كەزەڭدە اسان قايعى كوشەسى جايلى تالقىلادىق. ول جاقتا بازار كوپ، كوشەلەر ۇلكەن ەمەس. كۇنىنە 30 مىڭ كولىككە ارنالعانىمەن، ارى-بەرى 100 مىڭ كولىك وتەدى. مىنە، وسى سەبەپتى، اسان قايعى كوشەسىنىڭ بىرنەشە بولىگىن سەگىز جولاقتى، ەڭ از دەگەندە التى جولاقتى ەتكىمىز كەلەدى»، - دەيدى ول.

ايتا كەتسەك، بۇعان دەيىن استاناداعى جەڭىل رەلستى كولىك جۇيەسىنىڭ (استانا LRT جوباسى) قۇرىلىسىنا 16,2 ميلليارد تەڭگە بولىنگەلى وتىرعانى حابارلانعان بولاتىن (2018-جىلى 9,1 ميلليارد تەڭگە، 2019-جىلى - 7,1 ميلليارد تەڭگە).