+7 (701) 759 90 19 Лента
20 °С : استانا
21 °С : الماتى
USD 342.49 EUR 400.85
RUB 5.51 CNY 51.33
جاڭالىقتار

نۇرسۇلتان نازاربايەۆ ەشكىمگە ايتپاعان سىرىمەن ءبولىستى

14 شىلدە 12:20 343
:ءبولىسۋ
نۇرسۇلتان نازاربايەۆ ەشكىمگە ايتپاعان سىرىمەن ءبولىستى

استانا. قازاقپارات - تاياۋدا عانا «حابار» تەلەارناسىندا «نازناچەننىي ۆرەمەنەم» دەپ اتالاتىن دەرەكتى فيلم كورسەتىلگەن بولاتىن.

تانىمال رەسەيلىك كينورەجيسسەر راديك كۋدوياروۆ تۇسىرگەن 2 سەريالى فيلمدە قازاقستاننىڭ تاۋەلسىزدىك العاننان كەيىنگى قالىپتاسۋ جولدارى، ەلباسى نۇرسۇلتان نازاربايەۆتىڭ قازاق مەملەكەتىن قۇرۋداعى باستى ءرولى جايىندا كەڭىنەن ءسوز قوزعايدى.

دەرەكتى فيلم ك س ر و- نىڭ سوڭعى ءارى تۇڭعىش پرەزيدەنتى ميحايل گورباچيەۆتىڭ كەڭەستىك يمپەريا كۇيرەپ، ونىڭ ورنىنا تاۋەلسىز 15 مەملەكەت قۇرىلۋىنا جانە ولاردىڭ ودان ارى دامۋدىڭ داڭعىل جولىنا ءتۇسىپ، وزگە ەلدەرمەن تەرەزەسى تەڭ مەملەكەت بولىپ ەل بولىپ قالىپتاسۋىنا شاك كەلتىرگەن سوزدەرىمەن باستالادى. ودان ارى ەلباسى نۇرسۇلتان نازاربايەۆ تاۋەلسىز قازاق ەلىن قالاي قۇرعانى، ىستانبۇل سامميتىنەن كەيىن 11 جىل بويى توقىراۋعا ۇشىراعان ەۋروپاداعى قاۋىپسىزدىك جانە ىنتىماقتاستىق ۇيىمىنىڭ تاريحي سامميتىن ەلوردا تورىندە وتكىزگەندىگى، رەسەي مەن ۋكراينا اراسىنداعى داعدارىستى رەتتەۋ ىسىنە قالاي ارالاسقانى جان-جاقتى باياندالادى.

فيلم بارىسىندا نۇرسۇلتان نازاربايەۆ بالالىق شاعىنا، ارمانىنا، تاۋدى قالاي جاقسى كورەتىندىگىنە، سول كەزەڭدەگى باستان كەشىرگەن قيىندىقتارىنا كەڭىنەن توقتالادى. اشقۇرساق، جىرتىق كيىم كيىپ جۇرسە دە بالالىق شاعىنىڭ باقىتتى بولعانىن باسا ايتادى.

«بالا كەزىمنەن ارمانشىل بولدىم، الدىمدا ۇلكەن دۇنيەلەردىڭ كۇتىپ تۇرعانىن سەزەتىنمىن. مۇنداي سەزىم جانىمدا ۇنەمى بولاتىن. ونىڭ قايدان كەلگەنىن دە بىلمەيمىن. اجەم بولاتىن، ول مەن وتە جاقسى كورەتىن. اندا-ساندا كورگەن ءتۇسىن ايتىپ بەرەتىن. ول بىردە تۇسىندە مەنىڭ جالعىز اقبوز اتقا ءمىنىپ تاۋعا شىعىپ بارا جاتقانىمدى كورىپتى. تاۋدىڭ ورتاسىنا جەتكەنىمدە توقتاپپىن. «توقتاما، جۇرە بەر، شىڭنىڭ باسىنا شىق»، دەپ ايتقان ەكەن. مەن الدىعا قاراي ءجۇرىپ، تاۋدىڭ شىڭىنا شىعىپپىن. سول كەزدە اجەم: «سەنىڭ تاعدىرىڭ دا سونداي، بولادى، بيىك شىڭداردى باعىندىراسىڭ» دەگەن ەدى»، - دەپ ەسكە الادى قازاقستان پرەزيدەنتى.

سونىمەن قاتار نۇرسۇلتان نازاربايەۆ فيلم بارىسىندا بۇعان دەيىن ەشكىمگە ايتپاعان سىرىمەن دە ءبولىستى.

«پوليتەحنيكالىق ينستيتۋتتىڭ ستۋدەنتى بولىپ جۇرگەن كەزىمدە ايناعا قاراپ تۇرىپ، «سەن حالقىڭ ءۇشىن ءبىر نارسە ىستەۋىڭ قاجەت» دەپ ايتاتىنمىن. مۇنى ەش ۋاقىتتا تىسىمنەن شىعارماعان ەدىم، بۇگىن ءبىرىنشى رەت ايتىپ وتىرمىن. سونداي دا جايت بولدى»، - دەدى ەلباسى.

مەملەكەت باسشىسى دومبىرا تارتقان ادامدى جاقسى كورەتىندىگىن، مۋزىكانى قۇلاي سۇيەتىندىگىن دە اتاپ وتەدى. اناسىنىڭ ءان سالىپ، اكەسىنىڭ جانىنان ولەڭ شىعارعانىن ەسكە الادى.

فيلم بارىسىندا ق ر پارلامەنتى سەناتىنىڭ ءتوراعاسى قاسىم-جومارت توقايەۆ قازاقستاننىڭ رەسەي جانە قىتاي حالىق رەسپۋبليكاسىمەن اراداعى شەكارا ماسەلەسىنىڭ قالاي تولىعىمەن شەشىلگەندىگىن دە ايتىپ بەرەدى. نۇرسۇلتان نازاربايەۆتىڭ قىتاي باسشىلىعىمەن داۋلى ايماقتارعا قاتىستى ماسەلەلەردى قالاي وڭتايلى شەشە العاندىعىنا توقتالادى.

«ءبىزدىڭ سىرتقى ىستەر مينيسترلىگىمىزدە داۋلى تەرريتوريالارعا ارنالعان 34 توم تاريحي كارتوگرافيالىق ماتەريالدار بولدى. سوندىقتان دا قىتاي حالىق رەسپۋبليكاسى مەن تاۋەلسىز قازاقستان اراسىنداعى شەكارالىق كەلىسسوزدەر بوس جەردەن باستالعان جوق. تەرريتوريالىق جول بەرۋ تۋرالى ءسوز دە قوزعالۋى مۇمكىن ەمەس ەدى. ءبىز بارلىق تاريحي ماتەريالداردى تىڭعىلىقتى قاراپ شىقتىق»، - دەدى ول.

سونىمەن قاتار فيلمدە رەسەي، قىتاي، جاپونيا، اۆستريا، بەلگيا، ۇلى بريتانيا، گەرمانيا، گوللانديا، يزرايل، يسپانيا، فرانسيا، يتاليا جانە شۆەيتساريانىڭ ديپلوماتيالىق ميسسيالارىنىڭ كوشباسشىلارى مەن وكىلدەرىنىڭ پىكىرلەرى دە بەرىلگەن.


باستى سوزدەر: بيلئك جانة ساياسات,
:ءبولىسۋ
ونلاين قىزمەتكەرلەر
رەداكتور
كۇنسۇلتان وتارباي
كۇنسۇلتان وتارباي
954-049
مۇراعات