قازاقستاندىقتار بيىل جازدا قايدا دەمالعاندى ءجون كورەدى؟

استانا. قازاقپارات - بيىلعى جازدا دەمالۋ ءۇشىن قازاقستاندىقتار تۇركيا، مىسىر، قىتاي، بىرىككەن اراب امىرلىكتەرى مەن سوچيدى تاڭداپ وتىر. بۇل تۋرالى قازاقپارات ءتىلشىسى «تۋريستىك قامقور» كورپوراتيۆتىك قورىنىڭ باسپا ءسوز قىزمەتىنە سىلتەمە جاساي وتىرىپ حابارلايدى.

وتكەن جىلمەن سالىستىرعاندا، مىسىرعا جولداما ساتىپ العانداردىڭ سانى 30 پايىزعا ارتقان. ەگەر ۋاقتىلى برون جاساعان بولساڭىز، مىسىرعا قاراي ورتاشا ەسەپپەن 300-500، ال تۇركياعا 500 ا ق ش دوللارىن جۇمسايسىز. الايدا تاجىريبە كورسەتىپ وتىرعانداي، جازعى دەمالىس كەيدە جانعا جايلى قىدىرىستان بولەك، ەداۋىر اۋرەگە دە اينالىپ كەتۋى ابدەن ىقتيمال.

ماسەلەن، جايلى دەمالىسىڭىزعا ويدا جوقتا پايدا بولىپ، اقشا قولعا تۇسكەننەن كەيىن عايىپ بولىپ كەتەتىن الاياق تۋرفيرمالار دا وسى ۋاقىتتا «ۇيقىسىنان ويانادى». ءتىپتى كەيبىر جاعدايدا بۇرىننان ابىرويى بار تۋرفيرمالار كەنەتتەن وزدەرىن بانكروت رەتىندە جاريالاي سالۋى دا مۇمكىن.

2010-2018-جىلدار ارالىعىندا تۋريستىك دەمالىستى كوزدەگەن 12 مىڭ قازاقستاندىق ونداعان ميلليونداعان دوللار شىعىن كورىپ، جاۋاپسىز تۋروپەراتورلاردىڭ سالدارىنان شەتەلدەگى دەمالىسىنان كەيىن وتانىنا ورالا الماي اۋرەگە تۇسكەن.

وسى جازدىڭ باسىندا دا وسىعان ۇقساس جاعداي الماتىدا تىركەلدى. ول كەزدە تۋرفيرمالاردىڭ ءبىرى 30 كليەنتتى تۇركياعا جالعان جولداما ساتىپ، 19 ميلليون تەڭگەگە الداپ كەتكەن. ماۋسىم ايىنىڭ سوڭىندا 18 قاراعاندىقتان پوليتسياعا ارىز كەلىپ ءتۇستى.

ولار الداپ كەتكەن تۋراگەنتتىكتىڭ ديرەكتورىنا ىزدەۋ سالىپ جاتىر. الاياققا الدانىپ قالعان تۋريستەر ەۋروپاعا ۇشۋى كەرەك بولاتىن. مۇنداي كۇردەلى جاعدايلاردان ساقتانىپ، دەمالىستى اۋرەگە اينالدىرماۋ ءۇشىن قازاقستاندىقتاردىڭ نە ىستەۋى كەرەكتىگى تۋرالى جوعارىدا اتالعان قوردا ءتۇسىندىرىلدى. ەڭ الدىمەن، ءوز وتەلىڭىزدىڭ برونىن، ۇيگە قايتا قايتۋ بويىنشا بيلەتتىڭ الىنعانىن، سونىمەن بىرگە ءوزىڭىزدىڭ تۋركودىڭىزدى تەكسەرىپ العان ابزال.

تۋريستىك كود 11 نەمەسە 13 (شىققالى وتىرعان مەملەكەتكە بايلانىستى) ءارىپتى-ساندى سيمۆولدان تۇرادى. ول ءاربىر جولدامانى ساتىپ العان كەزدە اۆتوماتتى تۇردە بەرىلەدى. بۇل سيفر ءاربىر تۋريست ءۇشىن بىرەگەي ەكەنىن ايتا كەتۋ كەرەك.

كۇردەلى جاعداي تۋىنداي قالعان جاعدايدا تۋريست قورمەن بايلانىسقا شىعىپ، ءوز تۋركودىنىڭ سانىن ايتىپ، 24 ساعاتتىڭ ىشىندە شۇعىل كومەكتى كۇتەدى. تۋركود جەكە پاراقتا دا، جولداما ارقىلى دا بەرىلەدى. بارلىق قازاقستاندىق تۋراگەنتتىكتەر جولدامانى ساتىپ العان كەزدە تۋركودتى تۋريستكە بەرۋگە مىندەتتى.

بۇل رەتتە تۋراگەنتتىكتەردىڭ ءبارى دە «تۋريستىك قامقوردىڭ» مۇشەسى ەكەنى ەسكەرىلۋى كەرەك. بۇلاي بولماعان جاعدايدا ول تۋرفيرمانىڭ جۇمىسى زاڭسىز دەپ تانىلادى دا، ول شەتەلگە شىققالى وتىرعان ءسىزدىڭ قاۋىپسىزدىگىڭىزدى قامتاماسىز ەتە المايدى. تۋركود ءسىزدىڭ وتانىڭىزعا ورالۋىڭىزدى ەڭ جاقىن ۋاقىتتاعى رەيس ارقىلى قامتاماسىز ەتۋگە قاۋقارلى. قور جۇمىسىن باستاعالى بەرى 450 مىڭ قازاقستاندىققا تۋركودتار بەرىلگەنىن ەرەكشە اتاپ ءوتۋ كەرەك.

مونيتورينگ جۇمىسى كورسەتىپ وتىرعانداي، قازاقستاندا تۋريستىك باعىتتا جۇمىس جۇرگىزۋدە 1500 ليتسەنزيا بەرىلگەن. الايدا ولاردىڭ تەك 500 ءى جۇمىس ىستەپ تۇر. تۋريستىك قىزمەت نارىعىنداعى تۋرفيرمالاردىڭ ءبارى ءالى «تۋريستىك قامقور» قورىنا كىرە قويعان جوق. ولاردىڭ تەك 59 ى عانا شەتەل ازاماتتاردىڭ كەپىلدەندىرىلگەن قاۋىپسىزدىگى جۇيەسىنىڭ قاتىسۋشىلارى بولىپ سانالادى.

«تۋريستىك قامقور» قورى 2016-جىلدىڭ 7- قاراشاسىنان باستاپ جۇمىس ىستەپ كەلەدى. زاڭناما اياسىندا قازىرگى تاڭدا www.fondkamkor.kz سايتىندا «قاتىسۋشىلاردى تىركەۋ» ءبولىمى بار.

مونيتورينگ مالىمەتىنە سايكەس، نارىقتى 80 پايىزدىق كورسەتكىشكە دەيىن قامتىپ، قور قۇرامىنا تاعى 20 تۋروپەراتوردى ەنگىزۋ كۇتىلۋدە.