ۆولەيبولدان ازيا چەمپيوناتى: «التاي» ءوز توبىندا كوش باستادى
چەمپيوناتتىڭ تاجىريبەلى كومانداسى رەتىندە «التاي» قىتايلىق تايبەيدى وڭاي جەڭەتىندەي كورىنگەن. الايدا ىسكە كەلگەندە قارسىلاس كوماندانىڭ تاستاي قورعانىسى التايلىقتاردى ايتارلىقتاي تەرلەتكەنى انىق. ءبىرىنشى پارتيانىڭ ناتيجەسى 21:25 ەسەبىمەن قارسىلاستاردىڭ ەسەسىندە كەتتى. ەكىنشى سەتتىڭ ورتاسىنا قاراي ويىننىڭ بەتالىسى زالداعى كورەرمەندەرىمىزدى ۇرەيلەندىرەيىن دەدى.
سەبەبى «CMFC» ءتورت ۇپايعا العا شىعىپ كەتكەن بولاتىن. الايدا «التاي» چەمپيوناتتىڭ كوشباسشىلارىنىڭ ءبىرى بولعاندىقتان، وڭاي بەرىلە سالۋ ويدا جوق-تىن. يۋري پانچەنكونىڭ شاكىرتتەرى دەر كەزىندە باسىمدىقتى جۇلىپ الىپ، تايبەيلىكتەردى ەكىنشى پارتيادا 25:18 ەسەبىمەن ارتتا قالدىردى. وسىدان كەيىن-اق «التايدىڭ» تاسى ورگە دومالادى.
ءتىپتى ءۇشىنشى سەتتى 25:13 ەسەبىمەن ايقىن جەڭىسكە ءبىرتابان جاقىندادى. ءتورتىنشى پارتيادا تاعى دا 25:23 ەسەبىمەن كوماندامىز قارسىلاستارىن تىزە بۇكتىردى. «التاي» ساپىندا جاسىنداي جارقىلداعان ولگا دروبىشيەۆسكايا جەڭىس گولىمەن كەزدەسۋگە نۇكتە قويدى.
ايتا كەتەرلىگى، ۇلتتىق قۇرامامىزدى قولداۋعا وبلىس اكىمى دانيال احمەتوۆ تا كەلگەن ەدى. ەرتەڭ ساعات 20:00 ۋاقىتىندا «التاي» ۆەتنامدىق VTV بين دەن لونگ ان» كومانداسىمەن ويىن وتكىزەدى. بۇگىنگى كۇنى «التاي» چەمپيوناتتىڭ «ب» توبىندا كوش باستاپ تۇر.