اشتىق كەزىندەگى اعزانىڭ جاعدايى
تاريحتا وتكەن اۋىر كەزەڭدەر ادامزاتتى بارلىعىنا ءتوزىمدى ەتىپ، ءپىسىرىپ شىعاردى. دەگەنمەن، توزە الادى ەكەنبىز دەپ اش قۇرساقپەن جۇرە بەرۋگە بولمايدى. اعزاعا باستى قۋات بەرۋ كوزى - گليۋكوزا. ال اسقازانعا ازىق تۇسپەسە، اعزا باسقا جولدارعا كوشۋگە ءماجبۇر بولادى: قاجەتتى گليۋكوزانى الۋ ءۇشىن گليكوگەندى ىدىراتادى. اشتىق سەزىمى ودان سايىن ارتىپ، دەنەڭىز كەرەكتى قۋاتتى باسقا جەردەن ىزدەۋدى تالاپ ەتەدى. تاۋلىك بويى اعزا بۇكىل گليكوگەندى جاراتىپ ۇلگەرەدى دە، جاعاتىن «جانارماي» ۇلەسىن ماي قورىنان الۋعا كوشەدى. ول دا بىتكەندە ادام شارشاپ، قۇلازىپ، اشۋلانشاق كۇيگە تۇسەدى. ءتىپتى ەڭ وڭاي تاپسىرمالاردىڭ ءوزى قارىن اشىپ تۇرعاندا ادامدى تىعىرىققا تىرەيدى. سەبەبى مي جۇمىسى ءۇشىن كۇنىنە كەم دەگەندە 120 گرامم گليۋكوزا قاجەت، ال سىزدە ول ءبىتىپ قالعان.
تابيعات بارلىعىنا جاعداي جاساپ قويعان. مي جاقىن ارادا گليۋكوزا كەلمەيتىنىن تۇسىنگەننەن كەيىن ونىڭ قالدىعىن كامپەسكەلەۋگە كىرىسەدى. دەنە ينسۋلين شىعارۋدى توقتاتادى، ونسىز گليۋكوزا بۇلشىقەتتەرگە بارا المايدى. ءبىر اپتا بويى اشىعۋ دەنەنى ۇنەمگە ابدەن ۇيرەتەدى. جۇرەك سوعىسى ەڭ تومەنگە دەڭگەيگە جەتەدى، قان قىسىمى مەن دەنە تەمپەراتۋراسى تومەندەيدى. دارۋمەندەر مەن مينەرالدار جەتىسپەۋشىلىگى تاعى ءبىر ماسەلەگە جول اشادى. يممۋندىق جۇيە دە ەڭ تومەنگى دەڭگەيمەن جۇمىس ىستەيدى، سەبەبى ونىڭ جۇمىسىنا رەسۋرستار جەتكىلىكسىز. قارنى اش ادام جاي عانا سۋىق تيگىزىپ اۋىرىپ قالسا دا، اعزاسى اۋرۋمەن كۇرەسە الماي، ولىمگە شالدىعۋى مۇمكىن. گليۋكوزا تىم از ەكەنىن، ءتىپتى ءبىتىپ قالاتىنىن ايتتىق. مي ونى الاتىن جەر تاپپاي، سوڭىندا دەنەدەگى اقۋىزدارعا شابۋىنا تۋرا كەلەدى. سونىڭ ناتيجەسىندە قانعا امينقىشقىلدارى ءتۇسىپ، بۇيرەك بۇل قىشقىلدى گليۋكوزاعا اينالدىرىپ، ميعا قۋانىشتى حابار جەتكىزەدى. بۇلشىقەت تە سەمەدى. ۇزاق ۋاقىتتىق اشىعۋدان كەيىن مۇنىڭ بارلىعىن قايتا قالپىنا كەلتىرۋ اسا قيىنعا سوعادى.
Massaget.kz