استانادا ەرەكشە جۇيەمەن جۇمىس ىستەيتىن باعدارشامدار ورناتىلادى
بۇل تۋرالى استانا قالاسىنىڭ جولاۋشىلار كولىگى جانە جول- كولىك ينفراقۇرىلىمى باسقارماسىنىڭ جەتەكشىسى اسحات قاراعويشين ايتتى، دەپ حابارلايدى قازاقپارات ءتىلشىسى.
«قالا اكىمىنىڭ تاپسىرماسى بويىنشا وسىدان ەكى اي بۇرىن، كوشەلەرگە ەكى جاڭا باعدارشام ورناتىلعان بولاتىن. ولار بۇگىندە سىناقتان ءوتتى. ەندى قالا بويىنشا ودان ءارى ورناتۋدى جوسپارلاۋدامىز. ءبىز ءۇشىن باعدارشامداردىڭ باستى ماڭىزى قاۋىپسىزدىكتى قامتاماسىز ەتۋى. اتالعان باعدارشامنىڭ ەرەكشەلىگى كۇندىز دە، تۇندە دە الىستان كورىنەتىن جارىق ديودتارى جانىپ تۇرادى، ونى بايقاماۋ مۇمكىن ەمەس. ەڭ باستى ناتيجە جول- كولىك وقيعالارى ازايدى، جاياۋ جۇرگىنشىلەر دە ەركىن ءجۇرىپ- تۇرادى» ، - دەدى اسحات قاراعويشين.
ونىڭ ايتۋىنشا، قالا بويىنشا جول- كولىك وقيعاسى ءجيى بولاتىن قاۋىپتى ايماقتارعا تاعى دا 11 باعدارشام ورناتۋ جوسپارلانۋدا.
سونىمەن قاتار باسقارما باسشىسى رەسپۋبليكا داڭعىلىنا ورناتىلعان ەرەكشە باعدارشامدى سىناقتان وتكىزۋ كەزىندە ول جەردە بىردە ءبىر جول- كولىك ەرەجەسىن بۇزۋ وقيعاسىنىڭ بولماعانىن ايتتى. جانە دە ەرەكشە باعدارشامنىڭ كادىمگى باعدارشامنان قىمباتىراق بولعانىمەن وتە ءتيىمدى ەكەنىن دە تىلگە تيەك ەتتى.
ايتا كەتەيىك، بۇرىنىراق رەسپۋبليكا داڭعىلىندا پيلوتتىق جوبا رەتىندە تىرەك ارقىلى ۆيزۋالدى جارىق بەرەتىن باعدارشام ورناتىلعانى تۋرالى ايتىلعان بولاتىن. اتالعان باعدارشامدار ماسكەۋ، كيەۆ، دۋباي سەكىلدى الەمنىڭ باسقا دا ءىرى قالالارىندا قولدانىلادى.