+7 (701) 759 90 19 Лента
4 °С : استانا
9 °С : الماتى
USD 369.36 EUR 431.30
RUB 5.45 CNY 53.80
جاڭالىقتار

تۇركىستان الەمدىك دەڭگەيدەگى شاھار رەتىندە دامىتىلادى

13 شىلدە 19:49 367
:ءبولىسۋ
تۇركىستان الەمدىك دەڭگەيدەگى شاھار رەتىندە دامىتىلادى

تۇركىستان. قازاقپارات - بۇگىن تۇركىستان وبلىسىنىڭ ورتالىعىندا ساۋلەتشىلەر مەن ارحەولوگتار، تاريحشىلار مەن سۋرەتشىلەر باس قوستى. ءوز سالالارىندا ەلىمىزگە بەلگىلى 40-قا جۋىق ازامات دوڭگەلەك ۇستەل بارىسىندا تۇركىستان قالاسىن تۇركى الەمىنىڭ رۋحاني- مادەني ورتالىعى رەتىندە دامىتۋ جايىن ءسوز ەتتى، دەپ حابارلايدى قازاقپارات ءتىلشىسى.

تۇركىستان قالاسىنداعى جيىنعا قاتىسقان وبلىس اكىمى جانسەيىت تۇيمەبايەۆ وبلىس ورتالىعىنا اينالىپ وتىرعان شاھاردى ەكونوميكالىق، الەۋمەتتىك، رۋحاني- مادەني جاعىنان دامىتۋ باستى ماقسات ەكەنىن اتاپ ءوتتى.

«تۇركىستان قالاسىن الەمدىك دەڭگەيدەگى تاريحي- مادەني ورتالىق رەتىندە دامىتۋ ءۇشىن «كونە تۇركىستان» تۇجىرىمدااماسى جاسالدى. ونىڭ باستى باعىتتارىنىڭ ءبىرى تۋريستىك يندۋستريانى دامىتۋ بولىپ بەلگىلەندى. جوبانىڭ نەگىزگى يدەيالىق ءمانى - تۇركىستان قالاسىن تۇركى الەمىنىڭ تاريحي استاناسى كونتەكسىندە «تۇركسوي» ۇيىمىنا مۇشە ەلدەرگە ۇسىنۋ. سونىمەن قاتار، تۇركىتىلدەس حالىقتاردىڭ ساۋلەتتىك، ەتنوگرافيالىق جانە ۇلتتىق گاسترونوميالىق باعىتتارىن تانىتىپ، قالانى تۇركى الەمىنىڭ مادەني ورتالىعىنا اينالدىرۋ بولىپ تابىلادى»، - دەدى وبلىس اكىمى.

ايماق باسشىسىنىڭ ايتۋىنشا، جالپى جوبا 99,6 گەكتار جەر اۋماقتى قامتي وتىرىپ، ءۇش كەزەڭدە ىسكە اسىرىلاتىن بولادى. ءبىرىنشى كەزەڭدە تۇركيا تاراپىنان سالىنعان مەشىتتىڭ وڭتۇستىك شىعىس بەتىندەگى 61,8 گەكتار جەر اۋماعىنا «ەتونوساياباق» سالۋ كوزدەلسە، ەكىنشى كەزەڭدە قوجا احمەت ياسساۋي كەسەنەسىنىڭ قارسى بەتىندەگى 12,3 گەكتار جەر اۋماعىندا «تۇرىكسوي» ۇيىمىنا مۇشە ەلدەردىڭ مادەني وشاقتارى مەن سول ەلدەردىڭ تاريحىن سيپاتتايتىن نىسانداردىڭ قۇرىلىسى جۇرگىزىلەتىن بولادى. ال، ءۇشىنشى كەزەڭدە قوجا احمەت ياسساۋي كەسەنەسىنىڭ 88,7 گەكتار اۋماعىنداعى بەكىنىس قورعانى مەن ارباتتى جانە ونىڭ بويىنداعى عيماراتتار جاڭعىرتىلماق.

وتىرىستا ءا. ح. مارعۇلان اتىنداعى ارحەولوگيا ينستيتۋتىنىڭ ديرەكتورى، تاريح عىلىمدارىنىڭ دوكتورى، پروفەسسور باۋىرجان بايتانايەۆ، ينتەللەكت- ەكسپەرت» الەۋمەتتىك- ەكونوميكالىق زەرتتەۋلەر ورتالىعىنىڭ ديرەكتورى، تاريح عىلىمدارىنىڭ دوكتورى، پروفەسور، اكادەميك ساتتار ءماجيتوۆ، ادەبيەت سىنشىسى، جازۋشى، تاريحشى عالىم قۇلبەك ەرگوبەك، ق ر قۇرمەتتى ساۋلەتشىسى، ساياساتتانۋ عىلىمدارىنىڭ كانديتاتى عابيت سادىربايەۆ، تاريح عىلىمدارىنىڭ دوكتورى، پروفەسسور حانگەلدى ءابجانوۆتار ءسوز الىپ، تۇركىستاندى دامىتۋ بويىنشا ءوز ويلارىن ورتاعا سالدى.

جيىندى قورىتىندىلاي كەلە وبلىس اكىمى تۇركىستان تۋريزم سالاسى بويىنشا سامارقان، بۇحارا، حيۋا سياقتى قالالارمەن باسەكەلەسىپ، تۇركى الەمىنىڭ استاناسى جانە وبلىس ورتالىعى رەتىندە الەمدىك ارەنادا قازاقستاننىڭ بەدەلىن بيىكتەتىپ، مارتەبەسىن اسقاقتاتاتىنىن جەتكىزدى. سونىمەن قاتار، ۇتىمدى ۇسىنىسقا قولداۋ بىلدىرگەن بارشا جيىنعا قاتىسۋشىلارعا شىنايى العىسىن ايتتى.

اۆتور: اينۇر اقبايەۆا


:ءبولىسۋ
ونلاين قىزمەتكەرلەر
رەداكتور
ريزابەك نۇسىپبەك
ريزابەك نۇسىپبەك
954-049
مۇراعات