قازاقستاننىڭ وڭىرلەرى تۇركىستانعا ءبىر عيماراتتان سالىپ بەرەدى

None
None
تۇركىستان. قازاقپارات - ەلباسى تاپسىرماسىنىڭ اياسىندا رەسپۋبليكانىڭ ءاربىر وبلىسى تۇركىستان قالاسىنا ءبىر عيماراتتان سىيعا تارتادى. بۇل تۋرالى وبلىس اكىمى جانسەيىت تۇيمەبايەۆ تۇركىستان قالاسىن تۇركى الەمىنىڭ رۋحاني- مادەني ورتالىعى رەتىندە دامىتۋ بويىنشا وتكەن جيىندا ايتتى.

 ماسەلەن، استانا قالاسىنىڭ اكىمى اسەت يسەكەشوۆ  «استانا» ساياباعىن سالۋ تۋرالى ۇسىنىس بىلدىرگەن، دەپ حابارلايدى قازاقپارات ءتىلشىسى.

جيىندا جانسەيىت تۇيمەبايەۆ 1500 جىلدان استام تاريحى بار تۇركىستاننىڭ وتكەنىنەن از- كەم سىر شەرتتى. قازاق حاندىعىنىڭ استاناسى بولعان بۇل مەكەن بۇكىل تۇركى الەمىنىڭ دە رۋحاني- مادەني استاناسى بولا بىلگەنىن جەتكىزدى. سونىمەن قاتار، اتالعان تاريحي شاھاردى ەلباسىنىڭ تاپسىرماسىنا سايكەس، قازاقستاننىڭ رۋحاني ورتالىعى باعىتىندا جانداندىرۋ جايىنا توقتالدى.

«تۇركىستان قالاسىندا بوي كوتەرەتىن تۇرعىن ۇيلەر كوپ قاباتتى بولمايدى. سەبەبى، قوجا احمەت ياسساۋي كەسەنەسىنىڭ بيىكتىگىنەن اسپاۋ كەرەك. بارلىق جەردە ماۆزولەي مۇمكىندىگىنشە كورىنىپ تۇرۋى قاجەت. سونداي- اق، باسپانالار ورتا- ازيالىق ستيلدە، ياعني كونە داۋىردەگى ساۋلەتپەن سالىنۋى ءتيىس. سوندا ەلىمىزدەگى، كەم دەگەندە، ءبىر قالا وسىنداي ەسكى كەلبەتپەن بوي كوتەرەدى»، - دەدى جانسەيىت تۇيمەبايەۆ.

تۇركىستان قالاسىن تۋريستەر ءۇشىن قولايلى ايماققا اينالدىرۋ ماسەلەسىن ءسوز ەتكەن ءوڭىر باسشىسى مۇندا جاڭادان اۋەجاي، تەمىرجول ۆوكزالى مەن اۆتوۆوكزال جانە قوناقۇيلەر، ءدامحانالار سالىناتىنىن اتاپ ءوتتى.

بۇدان بولەك، اكىم ق. ا. ياسساۋيعا قاتىستى جاريالانعان قۇندى جادىگەرلەردىڭ كوپتىگىنەن ارنايى ياسساۋي مۋزەيى سالىنۋ قاجەتتىگىنە دە توقتالدى.

اۆتور: اينۇر اقبايەۆا

سوڭعى جاڭالىقتار