قىرعىزستاندا دەپۋتاتتار بىشكەك مەرىنىڭ وتستاۆكاعا كەتۋىن تالاپ ەتتى

بىشكەك. قازاقپارات - بۇگىن بىشكەك قالالىق كەنەش دەپۋتاتتارى قالا مەرى البەك يبرايموۆكە سەنىمسىزدىك ۆوتۋمىن ءبىلدىردى، دەپ حابارلايدى «قازاقپارات» ح ا ا- نىڭ مەنشىكتى ءتىلشىسى.

بۇگىن بىشكەك قالالىق كەنەشىنىڭ كەزەكتەن تىس وتىرىسىندا دەپۋتاتتار قالا مەرىنە سەنىمسىزدىك ۆوتۋمىن ءبىلدىرۋ تۋرالى شەشىم شىعاردى.

 بۇعان 7 - شىلدە كۇنى ۆيتسە- مەر رەنات ماكەنوۆتىڭ ۇستالۋى سەبەپ بولعان. ول زاڭسىز جەر ۋچاسكەلەرىن ءبولۋ دەرەگىنە قاتىستى قىلمىستىق ءىستى تەرگەپ- تەكسەرۋ اياسىندا ۇستالدى. ال بىشكەك مەرى 10 - شىلدەدەن 8 - تامىزعا دەيىن ەڭبەك دەمالىسىنا كەتكەن بولاتىن.

ا. يبرايموۆتىڭ قالا ومىرىندەگى وسىنداي قىسىلتاياڭ تۇستا دەمالىسقا كەتكەنى دەپۋتاتتاردىڭ ىزاسىن كەلتىرگەن. وسىعان بايلانىستى قالالىق كەنەش كەزەكتەن تىس وتىرىس شاقىردى.

«قىسقا، مەيرامدارعا دايىندىق جۇرگىزۋ كەرەك، قانشاما جولدار سالىنۋى ءتيىس. وسىنىڭ ءبارى جازدا ىستەلەدى. بۇكىل جۇمىس ءبىر ورنىندا تۇر، ال ءبىرىنشى ۆيتسە- مەر قاماۋدا جاتقان كەزدە ونىڭ دەمالىسقا كەتكەنىن قالاي تۇسىنۋگە بولادى؟ قالا باسشىسى جاۋاپتى تۇلعا بولۋى ءتيىس!»، - دەيدى قالالىق كەنەش ءتوراعاسى الماز كەنەنبايەۆ.

 وسىدان كەيىن دەپۋتاتتار ءوز كانيكۋلدارىنان باس تارتتى.

بىشكەك مەرى بۇل وتىرىسقا قاتىسقان جوق. ءبىراق ارتىنشا ب ا ق- تا ۆيدەوروليك جاريالاندى.

«وكىنىشكە قاراي، مەن بىشكەك كەنەشىندە بولىپ جاتقان وقيعالار تۋرالى كەيىن ءبىلدىم. مەن ءۇش كۇن تاۋدا بولدىم. جۋىق ارادا ناقتى مالىمدەمە جاسايمىن. بۇگىنگى شەشىم ساياسي تاپسىرىس دەپ ويلايمىن. سوندىقتان الداعى ۋاقىتتا تىكەلەي ەفيردە سۇحبات بەرۋگە دايىنمىن»، - دەيدى مەر.

البەك يبرايموۆ 2016 -جىلدىڭ اقپانىندا بىشكەك مەرى بولىپ سايلانعان. ونىڭ وتستاۆكاعا كەتۋ- كەتپەۋى تۋرالى قورىتىندى شەشىمدى ەلدىڭ پرەمەر- ءمينيسترى قابىلدايدى.