جىلاننىڭ ۋىنان شاراپ ىشپەكشى بولعان قىتايلىق بويجەتكەن كوماعا ءتۇسىپ قالدى

 استانا. قازاقپارات - قىتاي تۇرعىنىن عالامتور ارقىلى ساتىپ العان ۋلى جىلان شاعىپ الىپ، كوماعا ءتۇسىپ قالدى.

بۇل تۋرالى South China Morning Post باسىلىمى حابارلادى، دەپ جازادى Stan.kz اقپاراتتىق اگەنتتىگى.

وقيعا 9 -شىلدەدە، دۇيسەنبى كۇنى شانشي پروۆينسياسىنىڭ ۆەينان قالاسىندا ورىن الدى. سياوفان ەسىمدى 21 جاستاعى قىتايلىق بويجەتكەن عالامتوردان ادام ءومىرى ءۇشىن وتە قاۋىپتى سانالاتىن ۋلى جىلان ساتىپ الدى.

قىزدىڭ اتا-اناسىنىڭ ايتۋىنشا، ۋلى جىلان سياوفاننىڭ ساۋساعىن شاعىپ العان. جىلان ۋلى بويىنا تاراعان قىزدىڭ ءبىر ساعاتتان كەيىن ۇيقىسى كەلىپ، جۇرەگى اينىي باستاعان. جاعدايى كۇرت ناشارلاعان بويجەتكەن بىردەن اۋرۋحاناعا جەتكىزىلگەنىمەن، كوپ ۇزاماي كوماعا ءتۇسىپ قالدى.

سونىمەن قاتار، ەمحانادا ۋدى قايتاراتىن پرەپارات بولماي، قاجەتتى ءدارى-دارمەكتەردى ءبىر تاۋلىك كۇتۋگە تۋرا كەلدى. ال، وسى ۋاقىت ارالىعىندا بويجەتكەندى شاعىپ العان ۋلى جىلان قاشىپ كەتكەن ەكەن. الايدا، ادام ءومىرى ءۇشىن قاۋىپتى سانالاتىن جىلان كەيىنىرەك ءۇيدىڭ جانىنان ءولى تابىلعان.

ءبىراق، قىزدىڭ تۋىستارى ونىڭ تەلەفونىنان جىلان ساتۋشى نەمەسە تاۋاردى جەتكىزۋشى تۋرالى ەشقانداي اقپاراتتى تابا المادى. دەگەنمەن، ونلاين تاپسىرىس فاكتىسى راستالدى. ءبىر قىزىعى، ساتۋشى قىتايلىق قىزعا جىلاننىڭ ۋلى ەكەنىن ەسكەرتكەن ەكەن.

الايدا، بويجەتكەن بۇل جىلاننىڭ ۋىنان ءداستۇرلى قىتاي مەديتسيناسىندا قولدانىلاتىن سۋسىن، سونىڭ ىشىندە كۇش- قۋاتتى ارتتىراتىن شاراپ جاساماقشى بولعان كورىنەدى. ول سۋسىندا دايىنداۋ ءۇشىن ۋلى جىلاندى كۇرىش شارابىنا نەمەسە نان سپيرتىنە سالىپ قويۋ كەرەك. ال، ول سۇيىقتىق (ەتانول) جىلاننىڭ ۋىن بەيتاراپتاندىرىپ، وسىلايشا ونى زيانسىز ەتەدى.