ەلوردانىڭ «تۇنگى سوتىنا» كىمدەر جۇگىنەدى
بۇل تۋرالى بۇگىن رەسپۋبليكالىق سۋديالاردىڭ كەڭەيتىلگەن كەڭەسىندە استانانىڭ مامانداندىرىلعان اۋدانارالىق اكىمشىلىك سوتىنىڭ سۋدياسى ۇلدانا سۇلەيمەنوۆا ايتتى، دەپ حابارلايدى قازاقپارات ءتىلشىسى.
«تۇنگى سوت» نە ءۇشىن قاجەت؟ ماسەلەن پوليتسيا قىزمەتكەرى جول-كولىك وقيعاسى بويىنشا حاتتاما تولتىرادى. جۇرگىزۋشىنىڭ كىنالى ەكەندىگى ايقىن جانە ول ونى مويىنداپ وتىر. الدىمەن پوليتسيانىڭ ماتەريالدى سوتقا جىبەرگەنىن كۇتەدى. ودان كەيىن سوت قارايدى. بۇعان قوسا، سوتتىڭ شەشىمى كۇشىنە ەنۋى ءتيىس. سودان كەيىن عانا ساقتاندىرۋ تولەمى جاسالادى. مۇنىڭ بارلىعىنا ءۇش اي ۋاقىت كەتەدى. وسى مەرزىم ىشىندە كولىك قاڭتارىلىپ تۇرادى. ال ول بىرەۋلەردىڭ جالعىز تابىس كوزى بولۋى مۇمكىن. جۇرگىزۋشى قۇقىق بۇزعانىمەن كەلىسەتىن ايقىن ىستەر 70 پايىزدان اسادى. ال «تۇنگى سوت» بۇل پروبلەمانى شەشەدى»، - دەدى ول.
ونىڭ ايتۋىنشا، استانانىڭ مامانداندىرىلعان اۋدانارالىق اكىمشىلىك سوتى كەشكى ساعات 18:30 دان 22:00 گە دەيىن كەزەكشىلىك ەنگىزگەن. اكىمشىلىك پوليتسيامەن مەموراندۋمعا قول قويىلىپ، ءوزارا ءىس-قيمىلدىڭ ناقتى الگوريتمى ازىرلەنگەن. حاتتاما تولتىرىلعاننان كەيىن ماتەريال ءبىر تاۋلىكتىڭ ىشىندە سوتقا تۇسەدى.
ءىس «تۇنگى سوتتا» قارالۋى ءۇشىن جۇرگىزۋشىنىڭ كىناسىن مويىنداۋ جانە تۇنگى ۋاقىتتا قاراۋعا كەلىسىمى قاجەت. سول كۇنى ءىستىڭ كەلەسى كۇنى قارالاتىندىعى تۋرالى شەشىم قابىلدانادى. بۇل جايىندا تاراپتارعا سمس كومەگىمەن حابارلاندىرۋ جىبەرىلەدى. ال ءۇشىنشى كۇنى تاراپتار سوت قاۋلىسىمەن ساقتاندىرۋ كومەگىن الۋعا بارادى. وسىلايشا، مۇنداي ىستەردى قاراۋ مەرزىمى 100 دەن 15 تاۋلىككە دەيىن قىسقارىپ وتىر.
جالپى، ىلكى جوبا قولعا الىنعان 20 جۇمىس كۇننىڭ ىشىندە «تۇنگى سوتتا» 300 ءىس قارالىپ، ءوز شەشىمىن تاپقان.
اۆتور: مارلان جيەمباي