لۋكاشەنكو روزا رىمبايەۆاعا «سلاۆيان بازارى» پرەزيدەنتتىك ماراپاتىن تابىس ەتتى

استانا. قازاقپارات - بەلارۋس پرەزيدەنتى الەكساندر لۋكاشەنكو «ۆيتەبسكىدەگى سلاۆيان بازارى» فەستيۆالىنىڭ سالتاناتتى اشىلۋ راسىمىندە ءانشى روزا رىمبايەۆاعا «ونەر ارقىلى - بەيبىتشىلىك پەن ءوزارا تۇسىنىستىككە» ارنايى ماراپاتىن تابىس ەتتى، دەپ حابارلايدى belta.by.

ءانشى بۇل ماراپاتتى ونىڭ شىعارماشىلىعىن مويىنداۋ دەپ قانا ەمەس، قازاقستاننىڭ ونەرىنە قۇرمەت كورسەتۋ ەكەندىگىن اتاپ ءوتتى.

«بەلارۋس پەن قازاقستاننىڭ قارىم-قاتىناسى ءاردايىم جىلى بولعان. ءبىز ونى جىلدار بويى ساقتاپ قالدىق»، - دەدى روزا رىمبايەۆا. ول بارلىق حالىققا بەيبىتشىلىك، تىنىشتىق جانە باقىت تىلەدى.

روزا رىمبايەۆا - ەسترادا ءانشىسى، اكتريسا جانە پەداگوگ، قازاقستاننىڭ حالىق ءارتىسى، استانانىڭ قۇرمەتتى ازاماتى. ونى قازاقستاننىڭ التىن داۋىسى جانە ورتالىق ازيانىڭ بۇلبۇلى دەپ اتايدى. روزا رىمبايەۆا ءوزىنىڭ شىعارماشىلىق مانسابىندا 18 جەكە البوم شىعارىپ، توعىز مۋزىكالىق جيناققا اتسالىسقان.

ايتا كەتەيىك، بەلارۋستىڭ ۆيتەبسك قالاسىنداعى «جۇلدىزدار الاڭىندا» قازاقستاندىق تانىمال ءانشى روزا رىمبايەۆانىڭ جۇلدىزى ورناتىلعان ەدى.