قازاقستاننان ەڭ كوپ قارجى اۋدارىلاتىن ەلدەر

 استانا. قازاقپارات - وزبەكستان قازاقستاننان مول قارجى اۋدارىلاتىن ەكىنشى ەل اتاندى.

بۇل جايىندا Podrobno.uz اقپارات كوزى حابار تاراتتى.

ناقتىراق ايتقاندا، قازاقستاندىق ranking.kz پورتالى قازاقستان ەكونوميكاسىنا مونيتورينگ جۇرگىزۋ جونىندەگى جوباعا سىلتەمە جاساي وتىرىپ، كەلتىرگەن دەرەككە قاراعاندا، وسى جىلدىڭ باسىنان مامىر ايىندا وزبەكستانعا قازاقستاننان 31,3 ميلليارد تەڭگە (91 ميلليون دوللاردان اسا) اۋدارىلعان.

ال وزبەكستاننان ەلىمىزگە اۋدارىلعان قارجى ونىڭ ءبىر شيرەگىندەي عانا - 7,5 ميلليارد تەڭگە (21,8 ميلليون دوللار شاماسىندا). قازاقستاننان بەلسەندى تۇردە اقشا اۋدارىلاتىن جانە كەرى اۋدارىلاتىن ەلدەردىڭ العاشقى بەستىگىنە رەسەي، وزبەكستان، تۇركيا، قىرعىزستان جانە تاجىكستان كىرگەن.

ەلىمىزدەن ەڭ كوپ قارجى رەسەيگە اۋدارىلعان - 89,4 ميلليارد تەڭگە، ال ول ەلدەن ەلىمىزگە اۋدارىلعانى - 50,6 ميلليارد تەڭگەنى قۇراعان. ءۇشىنشى ورىنعا تۇركيا جايعاسقان - ەلىمىزدەن اۋدارىلعانى 24,4 ميلليارد تەڭگە، ال كەرى اۋدارىلعانى 9 ەسە از - 2,7 ميلليارد تەڭگە. سونداي-اق، قازاقستاننان قىتايعا دا كوپ مولشەردە قارجى اۋدارىلعان - 15,9 ميلليارد تەڭگە، ۋكراينا - 5,4 ميلليارد تەڭگە، ءازىربايجان - 4,5 ميلليارد تەڭگە، گرۋزيا - 1,9 ميلليارد تەڭگە.