قىتايدىڭ شيان قالاسىنداعى مۋزەيدە «التىن ادام» كورسەتىلدى

بەيجىڭ- شيان. قازاقپارات - كەشە ق ح ر شانشي پروۆينسياسى شيان قالاسىندا «ۇلى دالا مۇراسى: زەرگەرلىك ونەردىڭ جاۋھارلارى» اتتى كورمە مەن «قاسيەتتى قازاقستان» فوتوكورمەسى وتكىزىلدى، دەپ حابارلايدى قازاقپارات ءتىلشىسى.

شارانى قازاقستان رەسپۋبليكاسىنىڭ ۇلتتىق مۋزەيى مەن شانشي پروۆينسياسىنىڭ تاريحي مۋزەيى «التىن ادامنىڭ بۇكىل الەم مۋزەيلەرىن شارلاۋى» اتتى حالىقارالىق كورمەلىك جوبانى جۇزەگە اسىرۋ اياسىندا ۇيىمداستىرعان.

 

كورمەنىڭ ەكسپوزيتسياسىنا «التىن ادام» عانا ەمەس، ەسىك قورعانىنان تابىلعان رۋنيكالىق جازۋى بار كۇمىس ىدىس، جارقىراعان، ءبىزدىڭ زامانىمىزعا دەيىن V- IV عاسىرلاردا سوعىلعان ەكى بارىس بەينەسى بەينەلەنگەن بەلدىك، XV عاسىردىڭ باسىندا جاسالعان بىرەگەي زەرگەرلىك بۇيىمدار، سونىمەن قاتار ورتالىق قازاقستانداعى تالدى- Ⅱ قورعانىندا تابىلعان (ءبىزدىڭ زامانىمىزعا دەيىن VII عاسىردىڭ ورتاسى) مۇرالار قويىلدى.

 

كورمەگە كەلۋشىلەر سونداي-اق 2012 -جىلدىڭ ءساۋىر ايىندا باتىس قازاقستان وبلىسىنىڭ تاقساي-1 كەشەنىندە تابىلعان ايگىلى سارمات ايەلىنىڭ رەكونسترۋكسيالانعان ءتۇرىن (ب. ز. د. VI عاسىردىڭ سوڭى مەن V عاسىردىڭ ورتاسى) كورە الادى.

 

كورمەگە قويىلعان بۇيىمداردىڭ كوپشىلىگى التىننان جاسالعان. كونە مۇرالار ساق- ءسىبىر اڭ ستيلىنىڭ جادىگەرلەرىنە جاتادى.

 

كورمەنىڭ اشىلۋ سالتاناتىندا شانشي پروۆينسياسى گۋبەرناتورىنىڭ ورىنباسارى لۋ جيۋان، قازاقستان رەسپۋبليكاسىنىڭ قىتايداعى ەلشىسى شاحرات نۇرىشەۆ، ق ر پارلامەنت ءماجىلىسىنىڭ دەپۋتاتتارى امانگەلدى داۋرەنبايەۆ پەن مۇرات تەمىرجانوۆ، شياندا اكرەديتاتسيادان وتكەن وڭتۇستىك كورەيا، تايلاند، مالايزيا مەن كامبودجا ەلدەرىنىڭ ديپلوماتتارى، شانشي پروۆينسياسىنىڭ مەملەكەتتىك ورگاندارىنىڭ، ىسكەرلىك جانە عىلىمي ورتانىڭ، ءبىلىم جانە مادەني مەكەمەلەرىنىڭ وكىلدەرى كەلىپ قاتىستى.

 

كورمە 2018 -جىلدىڭ 12 -قىركۇيەگىنە دەيىن جالعاسادى.

ەسكە سالا كەتسەك، «التىن ادامنىڭ بۇكىل الەم مۋزەيلەرىن شارلاۋى» اتتى حالىقارالىق كورمەلىك جوباسى بەلارۋس ەلىنەن (مينسك، 2017 -جىل) باستاۋ الىپ، رەسەي ارقىلى (ماسكەۋ، 2018 -جىلدىڭ ءساۋىر- مامىرى) وتكەن بولاتىن.

وسى جىلى قىتايدىڭ شيان قالاسىنداعى مۋزەيدەن كەيىن «التىن ادام» ازەربايجان رەسپۋبليكاسىنىڭ (باكۋ) ۇلتتىق مۋزەيىندە، گدانسك ۇلتتىق مۋزەيىندە (گدانسك، پولشا) جانە كورەيانىڭ (سەۋل) ۇلتتىق مۋزەيىندە كورسەتىلەتىن بولادى. ال 2019 -جىلى جوبا ارقىلى جاپونيا، گرۋزيا، ۇلى بريتانيا، يسپانيامەن تۇركيا، 2020 -جىلى ا ق ش، يتاليا، اۆستريا، فرانسيا مەن گەرمانيانى باسىپ ءوتۋ كوزدەلگەن.