وڭتۇستىك كورەيادا «قىز جىبەك» ميۋزيكلى ساحنالاندى

استانا. قازاقپارات -  قازاقتىڭ ماحاببات تۋرالى ليرو- ەپوستىق داستانى ەندى وڭتۇستىك كورەيا تۇرعىندارىنا دا تانىس. ۇلى دالا ەلى فولكلورىنىڭ ءىنجۋ- مارجانى سانالاتىن «قىز جىبەك» سپەكتاكلى حالىقارالىق ميۋزيكلدەر فەستيۆالى اياسىندا تەگۋ قالاسىندا ساحنالاندى. وڭتۇستىك كورەيالىق تەگۋ قالاسىندا وتەتىن فەستيۆال - الەمدەگى جالعىز حالىقارالىق ميۋزيكلدەر شاراسى. وعان العاش رەت وتاندىق كاسىبي تەاتر شاقىرتۋ الدى.

 ۇيىمداستىرۋشىلار ارتيستەردەن «قىز جىبەك» قويىلىمىن قويۋدى وتىنگەن. سەبەبى سپەكتاكل قازاقتىڭ ۇلتتىق بەينەسىن ايقىندايتىن بىردەن ءبىر تۋىندى. تەگۋ قالاسىندا وتكەن ميۋزيكلدار فەستيۆالىنە سەگىز مەملەكەتتىڭ تەاترلارى قاتىستى. وسىلايشا وڭتۇستىك كورەيالىق كورەرمەندەر ءوز ەلىنەن شىقپاي اق وزگە ەلدەردىڭ مادەنيەتىمەن تانىسۋعا تەڭدەسىز مۇمكىندىك الدى.

 پاك چونگ سۋك، تەگۋ قالاسى حالىقارالىق ميۋزيكلدەر فەستيۆالىنىڭ اتقارۋشى ديرەكتورى:

- «قىز جىبەك» ميۋزيكلى مەن كورگەن تۋىندىلارعا مۇلدەم ۇقسامايدى. ەرەكشە ءارى كەرەمەت شىعارما. دەگەنمەن كورەرمەندەر ونى بىردەن قابىلداماۋى مۇمكىن. تەگۋ قالاسىندا ءوتىپ جاتقان شارادان سوڭ وڭتۇستىك كورەيالىقتار قازاقستاندىق تۋىندىلارمەن قىزىعۋشىلىق بىلدىرە باستايتىنىنا سەنىمىم مول.

وپەرا، روك، قازاقتىڭ ۇلتتىق مۋزىكاسى، كاسكادەرلىق تريۋكتەر. بۇل جانردىڭ بارلىعى «قىز جىبەك» ميۋزيكلىندا كورىنىس تابادى. رەكۆيزيتتەردىڭ كوپ بولعانى سونشالىق، كورەياعا الدىمەن جۇكتەر بولەك جىبەرىلگەن. سونداي- اق قويىلىمنىڭ ءماتىنىن اعىلشىن جانە كورەي تىلىنە اۋدارۋ كوپ ۋاقىتتى تالاپ ەتكەن.

نۇرقانات جاقىپباي، «جاستار» تەاترىنىڭ كوركەمدىك جەتەكشىسى:

- ءبىز فەستيۆالدا كوپتەگەن باسقا ميۋزيكلداردى كوردىك. وندا ءبىرى بالەت بيلەسە، ەندى ءبىرى حوردا ءان ايتادى. ال ءبىز بالەتتى دە ءوزىمىز بيلەپ، ءاندى دە ءوزىمىز ايتامىز. سيرككە ءتان تريۋكتەردى دە ءوزىمىز ورىندايمىز. ءبىزدىڭ ەرەكشەلىگىمىز دە مىنە وسىندا.

 كورەرمەننىڭ قوشەمەتىنە قاراعاندا «قىز جىبەك» ميۋزيكلى كوپشىلىكتىڭ كوڭىلىنەن شىقسا كەرەكتى. اسىرەسە ارتىستەردىڭ داۋىس ىرعاعى مەن اكروباتيكالىق ءىس- قيمىلدارىنا قوناقتار ەرەكشە ءتانتى بولدى.

 چو حەن دجۋ، تەگۋ قالاسىنىڭ تۇرعىنى:

 - ماعان قازاق عاشىقتارىنىڭ وقيعاسى قاتتى ۇنادى. باستى رولدەگى ءارتىستىڭ ويىنى كوڭىلدەن شىقتى. مەنىڭ ويىمشا كورەيا مەن قازاق مۋزىكالارىنىڭ ۇقساستىعى قويىلىمنىڭ تۇسىنىكتى بولۋىنا اسەر ەتتى. بۇگىنگى كەشتەن سوڭ، قازاقستاننىڭ مادەنيەتى مەن مۋزىكاسى تۋرالى كوپ دۇنيەنى تانىپ بىلۋگە قۇشتار بولىپ وتىرمىن.

قىز جىبەك پەن تولەگەننىڭ ماحاببات حيكاياسى تەك كورەرمەنگە ەمەس، شارا ۇيىمداستىرۋشىلارىنا دا ۇنادى. ەلوردالىق «جاستار» تەاترىنىڭ ارتىستەرى بولاشاقتا تەگۋ قالاسىنا قايتا كەلىپ، قازاق ونەرىنىڭ وزگە دە تۋىندىلارىن ساحنالاۋعا ۋادە بەردى.

 اۆتورلارى: ۆلاديسلاۆ سوي، ولگا ليان

www.24.kz