گەرمانيا ازاماتى وزبەكستاننىڭ يننوۆاتسيالىق دامۋ ۆيتسە- ءمينيسترى بولىپ تاعايىندالدى

تاشكەنت. قازاقپارات - وزبەكستان پرەزيدەنتىنىڭ بۇيرىعىمەن گەرمانيا ازاماتى كارستەن حاينتس وزبەكستان رەسپۋبليكاسىنىڭ يننوۆاتسيالىق دامۋ ءمينيسترىنىڭ ورىنباسارى اتاندى، دەپ حابارلايدى قازاقپاراتتىڭ مەنشىكتى ءتىلشىسى.

 وزبەكستاننىڭ يننوۆاتسيالىق دامۋ مينيسترلىگى باسپا ءسوز قىزمەتىنىڭ مالىمدەۋىنشە، كارستەن حاينتس ەڭبەك جولىن 1985 -جىلى گەرمانيانىڭ ارحەولوگيا جانە ەجەلگى تاريح ينستيتۋتىندا باستاعان. 1991 -جىلدان قازىرگى ۋاقىتقا دەيىن گەرمانيانىڭ عىلىمي زەرتتەۋلەر جانە ءبىلىم مينيسترلىگى جۇيەسىندە قىزمەت ەتىپ كەلەدى. سونداي- اق، 4 جىل ماسكەۋدەگى گەرمانيا ەلشىلىگىندە عىلىم جانە ءبىلىم ءبولىمىنىڭ باسشىسى رەتىندە ديپلوماتيالق قىزمەت اتقارعان. سونىمەن قاتار، ك. حاينتس ەجەلگى ارمەنيا تاريحى بويىنشا عىلىمي ەڭبەكتىڭ اۆتورى.

2013 -جىلدان بەرى گەرمانيانىڭ ءبىلىم جانە عىلىمي زەرتتەۋلەر مينيسترلىگىنىڭ «ماكس پلانك اتىنداعى قوعام، فرانگوۋفەر اتىنداعى قوعام، عىلىمي زەرتتەۋلەردىڭ يننوۆاتسيالىق باعدارى» ءبولىمى باسشىسىنىڭ ورىنباسارى رەتىندە قىزمەت اتقارعان.

سونىمەن قاتار، ك. حاينتس - گەرمانيانىڭ ەنەرگەتيكا سالاسىن زەرتتەۋمەن اينالىساتىن عىلىمي مەكەمەلەردى ۇيلەستىرۋ جۇيەسىنىڭ تاجىريبەلى مامانى.