شەتەلدەگى قانداستارىمىز اتاجۇرتتا دوپ تەبەدى
وسىمەن ءتورتىنشى مارتە ۇيىمداستىرىلعالى وتىرعان دودا اتاقتى ءانشى، كومپوزيتور، ءبىرتۋار ونەر ءدۇلدۇلى سەگىز سەرى باحرام ۇلىنىڭ 200 جىلدىق مەرەيتويىنا ارنالىپ وتىر.
اتالعان تۋرنيردىڭ باستى ماقساتى - باحرام ۇلىنىڭ ەڭبەگى مەن ونەگەلى ءومىرىن جاستارعا ۇلگى ەتە وتىرىپ، شەتەلدە تۇراتىن قازاق جاستارىنا تاۋەلسىز قازاق ەلىنىڭ تىنىس-تىرشىلىگىن تانىستىرۋ، سپورتتىق ويىن ارقىلى اتاجۇرتىمەن مادەني-رۋحاني بايلانىسىن نىعايتۋ.
«ەر جانىبەك» حالىقارالىق قوعامدىق قورىنىڭ «ER JANIBEK CUP» تۋرنيرىنە فرانسيا، اۆستريا، دانيا، تۇركيا، يران، قىتاي، رەسەي، مونعوليا، وزبەكستەن، قىرعىزستاندا تۇراتىن قازاق جاستارىنان قۇرالعان كوماندالار جانە قازاقستاننىڭ ءار وبلىسىنان جينالعان قازاق فۋتبولشىلارى قاتىسادى.
ەسكە سالساق، «ەر جانىبەك» حالىقارالىق قوعامدىق قورى 2006-جىلى قازاقستاندا قۇرىلعان. حالىقارالىق قور شەتەلدەردە جانە ەلىمىزدە مادەني- رۋحاني، قازاق تاريحىنداعى ەلەۋلى تۇلعالاردى دارىپتەۋگە ارنالعان شارالاردى ۇيىمداستىرىپ، ايتىس ونەرى مەن الاش ارىستارىنا ارنالعان جوبالاردى قولداپ، قارجىلاندىرۋمەن اينالىسادى.
اۆتور: كۇنسۇلتان وتارباي