ايدوس سارىم: جۇرتشىلىققا دۇرىس نارىقتىق كورقاراستاردى ناسيحاتتاۋ كەرەك
«اتامەكەن» ۇلتتىق كاسىپكەرلەر پالاتاسىنىڭ پىكىرتالاس كلۋبىنىڭ بۇگىنگى وتىرىسىندا بەلگىلى ساياساتتانۋشى ايدوس سارىم وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«سوڭعى ءبىر 20 جىلدى الاتىن بولساق، قازاق ادەبيەتىندە بيزنەسكە قاتىستى قانداي پوۆەست نەمەسە رومان وقىدىڭىزدار؟ ءبىزدىڭ جازۋشىلاردىڭ بيزنەسمەندەردى جاعالاپ ءجۇرىپ، دەمەۋشى ىزدەيتىنى راس. ءبىراق، بيزنەستى بيزنەس رەتىندە قازاقتىڭ ىشىندە ناسيحاتتاعان ءبىر ۇلكەن ءونىم جوق. مەن كەزىندە بولشيەۆيكتەردىڭ مەملەكەتتىك تاپسىرىس بويىنشا جازعان «ماگنيت كودى» تۋرالى جاز نەمەسە باسقاسى دەگەندى ايتپاي-اق قويايىن. ءبىراق، وسىنى ءبىر فەنومەن رەتىندە اشقان، مەنىڭ ويىمشا، ۇلكەن تۋىندى جوق سياقتى»، - دەيدى ايدوس سارىم.
ساياسات تانۋشىنىڭ ايتۋىنشا، جازۋشى كورپۋسى نەگىزىنەن كەڭەس زامانىندا دۇنيەگە كەلگەندىكتەن، ونىڭ نەگىزىگى قۇندىلىقتارى - بولشيەۆيكتىك، كەڭەستىك، سولشىل كوزقاراستارعا جاقىن سياقتى.
«بىزدە بايلىقتىڭ قاسىندا نەگاتيۆتى كاناتاتسيا كوپ. بيزنەسمەن دەگەن شىن مانىندە ءوزىنىڭ ءومىرى مەن تاعدىرىن قولىنا العان ادام عانا ەمەس، ول بىردەڭەنى ۇرلاپ العان، اۋىردىڭ ۇستىمەن، وڭايدىڭ استىمەن جۇرگەن ادام دەگەن سەكىلدى سولاقاي پىكىرلەر كوپ. سوڭعى ساۋالنامالاردى قارايىق: مىسالى توقسانىنشى جىلداردىڭ باسىندا جاستارىمىزدىڭ باسىم كوپشىلىگى بيزنەسمەن، قارجىگەر، بانكير بولامىن دەسە، بۇگىنگى جاستاردىڭ تالاپ-تىلەكتەرى مەملەكەتتىك قىزمەت پەن كۇشتىك قۇرىلىمداردان اسپايتىن سياقتى. ياعني، مەملەكەتتىك كۇشتى پايدالانۋ ارقىلى بيزنەس جاساۋ كەرەك دەپ ويلايدى. وعان دا نەگىز بار. سەبەبى، جاستار اقىماق ەمەس. ءومىردىڭ شىندىعىن كورىپ ءجۇر»، - دەيدى ول.
ايدوس سارىمنىڭ سوزىنە سايكەس، كەڭەس زامانىنان كەلە جاتقان «باي جامان، بايلىق جامان» دەگەن تاپتاۋرىن تۇسىنىكتەردى «سىندىرۋ» كەرەك.
«ءبىزدىڭ جازۋشىلار كورپوراتسياسى سول سولشىل كوزقاراستاردى ءال كۇنگە دەيىن جالعاستىراتىن تاپ بولىپ كەلەدى. ويتكەنى، ءبىزدىڭ كلاسسيك جازۋشىلارىمىز بۇگىنگە دەيىن سۇحبات بەرىپ وتىرىپ، «نارىق زامانى - ءيتتىڭ زامانى» دەگەن سەكىلدى وي ايتادى. راس قوي. ياعني، مەنىڭ ناقتى ۇسىنىسىم - «اتامەكەنگە» (ۇ ك پ - اۆت.) نەمەسە ءىرى كاسىپكەرلەرگە جالپى قازاق ىشىندەگى دۇرىس ليبەرالدىق، دۇرىس نارىقتىق كوزقاراستاردى ناسيحاتتاپ، سونىڭ ادەبي نۇسقاسىن بەرۋى كەرەك»، - دەيدى ايدوس سارىم.
ەسكە سالا كەتسەك، اتالعان وتىرىستا اۋىل تۇرعىندارىنا كاسىپ اشۋدا قولدانىلاتىن تەرميندەر مەن تىركەستەردى تۇسىندىرۋگە ارنالعان «كاسىپكەرلەر سوزدىگى» تانىستىرىلعان بولاتىن. اتالعان وقۋلىقتى «اتامەكەن» ۇلتتىق كاسىپكەرلەر پالاتاسى مەن ا. بايتۇرسىن ۇلى اتىنداعى ءتىل ءبىلىمى ينستيتۋتى بىرلەسىپ شىعارىپ وتىر.