ەلباسىنا ءومىر بويى قاۋىپسىزدىك كەڭەسىن باسقارۋ قۇقىعى بەرىلدى - زاڭ

استانا. قازاقپارات - «قازاقستان رەسپۋبليكاسىنىڭ قاۋىپسىزدىك كەڭەسى تۋرالى» زاڭى كۇشىنە ەندى. اتالم زاڭنىڭ ءماتىنى «ەگەمەن قازاقستان» گازەتىنىڭ بۇگىنگى سانىندا جاريالاندى، دەپ حابارلايدى قازاقپارات ءتىلشىسى.

اتالمىش زاڭ قازاقستان رەسپۋبليكاسى قاۋىپسىزدىك كەڭەسىنىڭ قۇقىقتىق مارتەبەسىن، قۇزىرەتىن جانە قىزمەتىن ۇيىمداستىرۋدى ايقىندايدى. وسى جىلدىڭ مامىر ايىندا ونى پارلامەنت قابىلداپ، قازاقستان پرەزيدەنتى 5- شىلدە كۇنى زاڭعا قول قويعان بولاتىن.

قۇجاتتا «قازاقستان رەسپۋبليكاسىنىڭ تۇڭعىش پرەزيدەنتىنە - ەلباسىنا ونىڭ تاريحي ميسسياسىنا بايلانىستى قاۋىپسىزدىك كەڭەسىن ءتوراعا رەتىندە باسقارۋ قۇقىعى ءومىر بويى تيەسىلى» ەكەنى جازىلعان. سونداي-اق، زاڭ بويىنشا قاۋىپسىزدىك كەڭەسىنىڭ قۇرامىن قازاقستان رەسپۋبليكاسىنىڭ پرەزيدەنتى قاۋىپسىزدىك كەڭەسىنىڭ توراعاسىمەن كەلىسە وتىرىپ قالىپتاستىرادى.

زاڭدا جازىلعانىنداي، قاۋىپسىزدىك كەڭەسى ىشكى ساياسي تۇراقتىلىقتى ساقتاۋ، كونستيتۋتسيالىق قۇرىلىستى، مەملەكەتتىك تاۋەلسىزدىكتى، اۋماقتىق تۇتاستىقتى جانە حالىقارالىق ارەنادا قازاقستاننىڭ ۇلتتىق مۇددەلەرىن قورعاۋ ماقساتىندا قازاقستان رەسپۋبليكاسىنىڭ پرەزيدەنتى قۇراتىن جانە قازاقستان رەسپۋبليكاسىنىڭ ۇلتتىق قاۋىپسىزدىگى مەن قورعانىس قابىلەتىن قامتاماسىز ەتۋ سالاسىندا ءبىرىڭعاي مەملەكەتتىك ساياسات جۇرگىزۋدى ۇيلەستىرەتىن كونستيتۋتسيالىق ورگان بولىپ تابىلادى.

«قاۋىپسىزدىك كەڭەسىنىڭ نەگىزگى مىندەتتەرى ەلدىڭ ۇلتتىق قاۋىپسىزدىگىن قامتاماسىز ەتۋ، قورعانىس قابىلەتىن نىعايتۋ، زاڭدىلىق پەن قۇقىقتىق ءتارتىپتى قامتاماسىز ەتۋ سالاسىنداعى مەملەكەتتىك ساياساتتىڭ نەگىزگى باعىتتارىن جوسپارلاۋ، قاراۋ جانە ولاردىڭ ىسكە اسىرىلۋىن باعالاۋ بولىپ تابىلادى. قاۋىپسىزدىك كەڭەسى قازاقستان رەسپۋبليكاسىنىڭ زاڭناماسىنا جانە قاۋىپسىزدىك كەڭەسى ءتوراعاسىنىڭ شەشىمدەرىنە سايكەس وزگە دە مىندەتتەردى ورىندايدى»، - دەلىنگەن زاڭدا.