رەسەيدەگى فۋتبولدان الەم چەمپيوناتىنا بارا جاتقان قازاقستاندىق بلوگەر تۋىستارىمەن بىرگە قازا تاپتى
6- شىلدە كۇنى چەليابى وبلىسىنىڭ سيم قالاسىنا جاقىن ماڭدا بولعان جول اپاتىنان مەرت بولعانداردىڭ جەكە باستارى انىقتالدى. كولىك اپاتى «ماسكەۋ- چەليابى م5» فەدەرالدى تراسساسىنىڭ 1592-شاقىرىمىندا ورىن الدى. الدىن الا مالىمەت بويىنشا، جەڭىل كولىكتىڭ جۇرگىزۋشىسى قارسى جولاققا شىعىپ كەتىپ، جۇك كولىگىمەن بەتپە-بەت سوقتىعىسقان. سوققى سالدارىنان جەڭىل كولىك جانا باستاعان.
وقيعا ورنىنا چەليابى وبلىسى بويىنشا ورتكە قارسى فەدەرالدى قىزمەتىنىڭ 10-ىنشى جاساعىنىڭ بولىمشەسى اتتاندىرىلعان. لاۋلاعان ماشينا سوندىرىلگەننەن كەيىن ونىڭ ىشىنەن ءۇش ادامنىڭ ءمايىتى تابىلدى.
بۇگىن انىقتالعانداي، كولىكتە الەۋمەتتىك جەلىدە Stence لاقاپ اتىمەن تانىمال قازاقستاندىق بلوگەر سۇڭقار كيلاج بولعان. ونىمەن بىرگە اكەسى جانە تۋىسقان اعاسى قازا بولدى. سۇڭقار ولارمەن بىرگە رەسەيدە ءوتىپ جاتقان فۋتبولدان الەم چەمپيوناتىن تاماشالاۋعا بارا جاتقان.
سۇڭقار كيلاج Stence Show YouTube-كانالىندا كومپيۋتەرلىك جانە ونلاين-ويىندارعا ۆيدەوشولۋلاردى جاريالاپ وتىرعان. سونداي-اق ول الەۋمەتتىك جەلىدە Stence page ءازىل-سىقاق پابليگىن جۇرگىزگەن.
ۆكونتاكتە الەۋمەتتىك جەلىسىندە بلوگەردىڭ قازاسىنا وراي توپ اشىلعان. وندا جەرلەۋ ءراسىمى 9- شىلدە كۇنى پەتروپاۆلدا وتەتىنى جازىلعان.