پاريجدە قازاق بالالارى سۋرەت سالۋدان جارىستى

پاريج. قازاقپارات - پاريجدە قازاق دياسپوراسىنىڭ باستاماسىمەن جانە قازاقستان ەلشىلىگىنىڭ قولداۋىمەن «استانا بالالار كوزىمەن» تاقىرىبىندا سۋرەت سالۋدان بايقاۋ ءوتتى، دەپ حابارلايدى قازاقپارات ق ر سىرتقى ىستەر مينيسترلىگىنە سىلتەمە جاساپ.

شىعارماشىلىق بايقاۋعا 7-17 جاس ارالىعىنداعى فرانسيادا تۇراتىن قازاق بالالارى قاتىستى. بارلىعى 19 جۇمىس ۇسىنىلدى.

قازاقستاننىڭ فرانسياداعى ەلشىسى جان عاليەۆ ماراپاتتاۋ كەزىندەگى ءوز سوزىندە وسىنداي دارىندى بالالاردى تاربيەلەگەن اتا-انالارعا العىس ايتىپ، مەرەكەلىك ءىس-شارانىڭ بارلىق قاتىسۋشىلارىن استانا كۇنىمەن قۇتتىقتادى. ەلشى ءوز سوزىندە استانا ەل بىرلىگىنىڭ سيمۆولى، بۇكىل قازاقستاننىڭ سەرپىندى، ءارى تۇراقتى دامۋىنىڭ ايعاعى ەكەنىن اتاپ ءوتتى. ونىڭ ايتۋىنشا، ءدال وسىنداي ءىس-شارالاردا بالالار اراسىندا قازاقستاندىق پاتريوتيزمدى قالىپتاستىرۋ جانە «ماڭگىلىك ەل» ۇلتتىق يدەياسىن جۇزەگە اسىرۋ نەگىزى قالانادى.

ءوز كەزەگىندە دياسپورا جەتەكشىلەرىنىڭ ءبىرى تابارىك دوگۋ: «كونكۋرسقا قاتىسقان كوپتەگەن بالالار استانادا بولعان ەمەس. ءبىراق بۇل ەلوردانىڭ باستى كورىكتى جەرلەرىن سۋرەتتەپ سالۋدا بالالارعا كەدەرگى بولعان جوق. بايقاۋدىڭ ماقساتى - بالالارعا پاتريوتيزمدى، تۋعان جەر مەن استاناعا دەگەن سۇيىسپەنشىلىكتى دارىپتەۋ. بالالار ءوز سۋرەتتەرى ارقىلى استانا كۇنىن اتاپ وتۋگە ءوز ۇلەستەرىن قوسقىسى كەلدى»، - دەپ اتاپ ءوتتى.

بايقاۋدىڭ جەڭىمپازدارى فاتماگۇل اپاك (1-ورىن)، ەمرە تۇرسىن (2-ورىن) جانە كەرىم الدۇرسىن (3-ورىن) اتاندى.