+7 (701) 759 90 19 Лента
16 °С : استانا
25 °С : الماتى
USD 360.12 EUR 409.67
RUB 5.33 CNY 52.34
جاڭالىقتار

فۋتبولدان الەم چەمپيوناتى: فينالدا كەزدەسەتىن كوماندالار انىقتالدى

12 شىلدە 07:21 270
:ءبولىسۋ
فۋتبولدان الەم چەمپيوناتى: فينالدا كەزدەسەتىن كوماندالار انىقتالدى

استانا. قازاقپارات - رەسەيدە ءوتىپ جاتقان 2018-جىلعى الەم چەمپيوناتىنىڭ جارتىلاي فينالى اياسىندا بۇگىن ماسكەۋدەگى «لۋجنيكي» ستاديونىندا حورۆاتيا مەن انگليا قۇرامالارى كەزدەستى، دەپ حابارلايدى قازاقپارات ءتىلشىسى.

ويىن اسا تارتىستى بولاتىنى و باستان بەلگىلى ەدى. العاشقى مينۋتتاردان-اق قاۋىپتى شابۋىلداردىڭ ۇيىمداستىرىلۋى دا ونى دالەلدەدى. سونداي شابۋىلداردىڭ بىرىنەن سوڭ انگليالىقتار ايىپ دوبىن تەبۋ مۇمكىندىگىن الدى. 5-مينۋتتا ونى قورعاۋشى كيران تريپپەر تاماشا ورىنداپ، ەسەپ اشتى - 1:0.

ەرتە گول جىبەرىپ العان حورۆاتتار ەسەپتى تەڭەستىرۋ ءۇشىن كوپ تەر توكتى. ءبىراق ءبىرىنشى تايمدا ونىڭ ءساتى تۇسكەن جوق. ال اعىلشىندار، كەرىسىنشە، كوپ كۇشپەن شابۋىلداۋدى دوعارىپ، ويىندى باقىلاۋدا ۇستاۋعا تىرىستى. ەكىنشى تايمنىڭ ورتاسىنا دەيىن مۇنىڭ ۇدەسىنەن شىعىپ تا ءجۇردى. 68-مينۋتتا شيمە ۆرسالكو وڭ قاناتتان ايىپ الاڭىنا اۋەلەتە ادەمى پاس بەردى. بىرنەشە قورعاۋشىنىڭ قورشاۋىندا جالعىز قالعانىنا قاراماستان، حورۆاتيالىقتاردىڭ شابۋىلشىسى يۆان پەريشيچ سول اياعىنىڭ سىرتىمەن سوققى باعىتتاپ، ەسەپتى تەڭەستىردى. ەسەپ 1:1.

وسىدان كەيىن كوماندالار شابۋىلعا لاپ قويا باستادى. ويىننىڭ قارقىنى ارتقانى سونشالىق، ءتىپتى، قاۋىپتى ساتتەردىڭ قايتالاماسىن كورۋگە ۋاقىت بولماي جاتتى. نەگىزگى ۋاقىتتىڭ سوڭعى ون بەس-جيىرما مينۋتىندا حورۆاتتار ايقىن باسىمدىققا قول جەتكىزىپ وتىردى. پلەي-وففتاعى بۇدان بۇرىنعى ەكى ويىندا پەنالتيلەر سەرياسىنا دەيىن ويناعاندىقتان، وسى ويىندا نەگىزگى ۋاقىتتا جەڭىستى ءىلىپ اكەتۋگە ۇمتىلعانى تۇسىنىكتى جايت. ءبىراق بۇنىڭ ۇدەسىنەن شىعۋ مۇمكىن بولمادى. تۇركيالىق تورەشى جۇنەيت چاكىر نەگىزگى ۋاقىتقا ءۇش مينۋت قوسىپ بەرگەن ەدى. بۇل مينۋتتاردا دا گول سوعىلماي، كوماندالار قوسىمشا تاعى ەكى تايم ويناۋعا ءماجبۇر بولدى.

ەكسترا-تايمداردىڭ العاشقىسىندا ويىننىڭ ءبىراز بەرەكەسى قاشقانداي بولدى. ويتكەنى ويىنشىلاردىڭ شارشاعانى بايقالا باستادى. سوندا دا زلاتكو داليچ جاتتىقتىراتىن حورۆاتيا گول سوعاتىن كۇش تابا ءبىلدى. ەكسترا- تايمداردىڭ ەكىنشىسىندە، دالىرەگى، 109-مينۋتتا يۆان پەريشيچ دوپتى كەنەت باسپەن ايىپ الاڭىنا اسىرىپ، ماريو ماندجۋكيچ گول سوقتى. ەسەپ - 2:1. ءبىر گول ايىرماسىمەن العا شىققان حورۆاتتار قايتكەندە دە وسى ەسەپتى ساقتاپ قالۋ ءۇشىن ويىندى باقىلاۋعا ۇمتىلدى. ۋاقىتتى دا سوزدى، باس باپكەر ويىنشىنى دا الماستىردى - ءبارىن ىستەدى. كەي كەزدەرى قارسىلاستار ءبىر-بىرىمەن جاعا جىرتىسۋعا دەيىن باردى. قىسقاسى، حورۆاتيا تاريحىندا العاش رەت الەم چەمپيوناتىنىڭ فينالىنا شىعۋدىڭ ۇدەسىنەن شىقتى.

انگليا ەندى 14- شىلدەدە بەلگيامەن ءۇشىنشى ورىن ءۇشىن الاڭعا شىعادى.

ەسكە سالايىق، كەشە، 10- شىلدە كۇنى فرانسيا بەلگيا قۇراماسىن 1:0 ەسەبىمەن جەڭىپ، فينالعا جولداما العان بولاتىن.

ەندى 15- شىلدەدە فرانسيا مەن حورۆاتيا فۋتبولدان 2018-جىلعى الەم چەمپيوناتىنىڭ جەڭىمپازىن انىقتايدى.


باستى سوزدەر: سپورت,
:ءبولىسۋ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
مۇراعات