باتىسقازاقستاندىق عالىمدار جاڭگىر حاننىڭ ءىزى قالعان ءوڭىردى زەرتتەمەك

 ورال. قازاقپارات - «رۋحاني جاڭعىرۋ» باعدارلاماسى اياسىندا «حان بوگەتى» حالىقارالىق عىلىمي- تانىمدىق ەكسپەديتسياسى ساپارعا شىقتى، دەپ حابارلايدى قازاقپارات ءتىلشىسى.

«كيەلى جەرلەر گەوگرافياسى» جوباسى اياسىندا جاڭگىر حان اتىنداعى باتىس قازاقستان اگرارلىق- تەحنيكالىق ۋنيۆەرسيتەتى ۇيىمداستىرىپ وتىرعان جورىق ماقساتى - ب ق و- نىڭ جانىبەك اۋدانىمەن شەكتەسەتىن ۆولگوگراد وبلىسى پاللاسوۆ اۋدانى اۋماعىندا بولىپ، جاڭگىر حاننىڭ ءىزى قالعان تاريحي ورىنداردى زەرتتەۋ.

ەكسپەديتسيا جەتەكشىسى، ۋنيۆەرسيتەت جانىنداعى جاڭگىر حان مۋزەيىنىڭ مەڭگەرۋشىسى نۇرجان تولەپوۆتىڭ ايتۋىنشا، عالىمدار كۋمىسولەچەبنيتسا ەلدى مەكەنى ماڭىنداعى «حان بوگەتىنە» ، باسقا دا كونە ورىندارعا بارىپ، تاريحي دەرەكتەردى، اڭىز اڭگىمەلەردى جيناستىرادى. تاريحي ەسكەرتكىشتەرمەن قاتار تابيعي ورىندار نازاردان تىس قالمايدى. قۇلپىتاستار دا سۋرەتكە تۇسىرىلمەك.

 جاڭگىر حان - اكەسى بوكەيدەن كەيىن بوكەي حاندىعىن 1824-1845 -جىلدارى باسقارعان بەلگىلى تۇلعا. ول 1826 -جىلدان باستاپ قازىرگى بوكەي ورداسى اۋدانى حان ورداسى اۋىلىندا جاسقۇس قۇمىنىڭ ەتەگىنەن ءوز ورداسىن سالدى. قازاقتار اراسىندا وتىرىقشىلىق تۇرمىستى ەنگىزىپ، تۇڭعىش رەت مەكتەپ، ءدارىحانا سەكىلدى قاجەتتى نىساندار تۇرعىزدى. بۇل ونىڭ قىس قىستاۋى بولسا، حان قازىرگى كەزدە ۆولگوگراد وبلىسى اۋماعىنداعى تارعىن وزەنى بويىنان جازعى ورداسىن سالعىزدى. ءوزى دە وسى جەردەن ومىردەن ءوتتى.

ال كۋمىسولەچەبنيتسا دەپ اتالاتىن مەكەندە اتاقتى اقىن شاڭگەرەي بوكەيەۆتىڭ قوس قاباتتى ءۇيى ورنالاسقان- دى. بۇل تاريحي مەكەندە باقىتجان قاراتايەۆ، ەلەۋسىن بۇيرين، عۇمار قاراش سىندى الاش قايراتكەرلەرى باس قوسىپ، 1911 -جىلى «قازاقستان» گازەتىن شىعارۋدى ۇيعاردى.

بىرنەشە كۇنگە سوزىلاتىن ەكسپەديتسيا قورىتىندىسىنا سايكەس ارنايى جيناقتار جارىق كورمەك.

ەسكە سالا كەتەيىك، بۇل - اتالمىش ۋنيۆەرسيتەت «رۋحاني جاڭعىرۋ» باعدارلاماسى اياسىندا قولعا العان وسىنداي ەكىنشى شارا. بۇدان بۇرىن يندەرگە دەيىنگى ەكسپەديتسيا بارىسىندا تىڭ ولجالار تابىلعانىن جازعان بولاتىنبىز.