استانادا قوعامدىق كولىك تاريفىنىڭ قىمباتتاۋ سەبەبىن ءتۇسىندىردى
2018 -جىلدىڭ 10 -شىلدەسىندە «استانا اقشامى»، «ۆەچەرنيايا استانا» گازەتتەرىندە جانە استانا اكىمدىگى سايتىندا «استانا قالاسى بويىنشا قالالىق جانە قالا ماڭى قاتىناستارىندا جولاۋشىلار مەن باگاجدى تۇراقتى اۆتوموبيل كولىگىمەن تاسىمالداۋ تاريفتەرىنىڭ كەيبىر ماسەلەلەرى تۋرالى» استانا اكىمدىگىنىڭ قاۋلىسى جاريالانعان بولاتىن.
بريفينگ بارىسىندا «استانا LRT» ج ش س باسقارما ءتوراعاسى بەكمىرزا يگەنبەردينوۆ «سارالانعان تاريفتى ەنگىزۋدەگى ماقسات - قوعامدىق كولىك سالاسىنداعى كولەڭكەلى اقشا اينالىمىن ءتۇپ تامىرىمەن جويۋ، بيۋدجەتكە تۇسىمدەردى مولايتۋ، قالانىڭ كولىك جۇيەسىن ودان ءارى دامىتۋعا كوبىرەك قاراجات ءبولۋ» ەكەنىن ايتىپ ءوتتى.
بۇل رەتتە تاريفتەر مىناداي مولشەردە بەلگىلەندى:
قولما قول اقشاسىز تولەۋ كەزىندە (كولىك كارتاسى ارقىلى):
داعدىلى قالالىق باعىتتاردا - 90 تەڭگە
ەكسپرەسس قالالىق باعىتتاردا - 180 تەڭگە
قالا ماڭى باعىتتارىندا - 1 ك م ءۇشىن 8 تەڭگە.
اقشالاي تولەۋ كەزىندە:
داعدىلى قالالىق باعىتتاردا - 180 تەڭگە
ەكسپرەسس قالالىق باعىتتاردا - 250 تەڭگە
قالا ماڭى باعىتتارىندا - 1 ك م ءۇشىن 11,5 تەڭگە.
سونىمەن قاتار، قاۋلىعا سايكەس، جول اقىسىن تولەۋدىڭ ەلەكتروندىق جۇيەسى ىستەمەي قالعان جاعدايدا، جول اقىسىن كولىك كارتاسىمەن تولەيتىن جولاۋشىنىڭ تەگىن جۇرۋگە قاقىسى بار.
ەندى كولىك كارتاسىن پايدالاناتىن جولاۋشىلاردىڭ العاشقى ۆاليداتسيا جاساعان ساتتەن باستاپ 60 مينۋت ىشىندە 1 (ءبىر) رەت تەگىن اۋىسىپ وتىرۋ مۇمكىندىگى بولادى. بۇرىن تەگىن اۋىسىپ وتىرۋ سانىنا شەك قويىلمايتىن.
سونداي-اق، «استانا LRT» باسشىلىعى سارالانعان تاريف ەنگىزىلگەنگە دەيىن پايدالانۋشىلارعا كولىك كارتالارىن ساتىپ الۋ مەن تولتىرۋدىڭ قولجەتىمدىلىگىن ءتۇسىندىرۋ جۇمىستارى جۇرگىزىلگەنىن اتاپ ءوتتى.
ەسكە سالا كەتەيىك، استاناداعى قوعامدىق كولىك جولاقىسىنىڭ 2018 -جىلدىڭ 21 -شىلدەسىنەن باستاپ قىمباتتايتىنىن وسىعان دەيىن جازعان بولاتىنبىز.