ەلباسى «بۋراباي» حالىقارالىق شاڭعى بازاسىن ارالاپ كوردى

كوكشەتاۋ. قازاقپارات - مەملەكەت باسشىسى نۇرسۇلتان نازاربايەۆ «شۋچە- بۋراباي» كۋرورتى ايماعىنداعى جاڭا تۋريستىك نىساندارمەن تانىستى. سونداي نىسانداردىڭ ءبىرى شۋچە قالاسىنداعى «بۋراباي» حالىقارالىق شاڭعى بازاسى، دەپ حابارلايدى قازاقپارات ءتىلشىسى.

مەملەكەت باسشىسىنىڭ ساپارى كەزىندە جاڭا شاڭعى بازاسىندا 200 دەن استام سپورتشىلاردىڭ وقۋ-جاتتىعۋ جيىنى ءوتىپ جاتتى. قازاقستاننىڭ ترامپليننەن سەكىرۋ سپورتىنىڭ ەڭ مىقتى شەبەرلەرى جاڭا ترامپليننىڭ ساپالى ەكەندىگىن وزدەرىنىڭ شەبەرلىكتەرىمەن كورسەتىپ بەردى.

ەلباسىنا «شۋچە- بۋراباي» كۋرورتى ايماعىن دامىتۋ بويىنشا اتقارىلىپ جاتقان جۇمىستار تۋرالى ق ر پرەمەر-ءمينيسترىنىڭ ءبىرىنشى ورىنباسارى اسقار مامين، ق ر مادەنيەت جانە سپورت ءمينيسترى ارىستانبەك مۇحامەدي ۇلى جانە اقمولا وبلىسىنىڭ اكىمى مالىك مىرزالين ەسەپ بەردى.

«وسىعان دەيىن تۋريزمگە ونشا كوڭىل بولىنبەي كەلدى. ءار نارسەنىڭ ءوز ۋاقىتى بار. جاعدايى بار قازاقستاندىقتار باسقا ەلدەردەگى كۋرورتتارعا بارىپ، دەمالىپ ءجۇردى. ەندىگى ۋاقىتتا قازاقستاننىڭ كوركەم جەرلەرىن وتانداستارىمىزعا عانا ەمەس، شەتەلدىكتەرگە كورسەتەتىن ۋاقىت جەتتى. تۋريزمدى قۋاتتى ەكونوميكانىڭ ءبىر سالاسى دەپ ەسەپتەۋىمىز كەرەك. قازىر «شۋچە- بۋراباي» كۋرورتتىنا بارۋ-كەلۋگە بارلىق جاعداي جاسالعان. «استانا-كوكشەتاۋ» اۆتوبانى سالىندى. كوكشەتاۋ اۋەجايى جۇمىس ىستەپ تۇر. ەندى بۋراباي كەنتىنە ىشكى جولدار سالىپ، ادامدار دەمالاتىن قولايى جاعداي تۋعىزۋىمىز قاجەت. بۇل وبلىس اكىمدىكتەردىڭ شارۋاسى. جالپى بۋرابايدى عانا ەمەس، يمانتاۋ، شالقار، باياناۋىل، تۇركىستاندا تۋريزمدى دامىتۋدى قولعا الۋىمىز قاجەت. تۇركىستان تۋريزمدى دامىتۋعا وتە قولايلى. ەڭ باستىسى ينفراقۇرىلىمدى دۇرىستاۋىمىز كەرەك. مەن بارلىق وبلىستارعا ارنايى تاپسىرما بەرەمىن»، - دەدى ن. نازاربايەۆ ءوز سوزىندە.

«بۋراباي» حالىقارالىق شاڭعى بازاسىنىڭ اۋماعى 125,54 گەكتاردى قۇرايدى. قۇرىلىس جۇمىستارى ەكى كەزەڭمەن جۇزەگە اسىرىلدى. ءبىرىنشى كەزەڭدە اۋماعى 111 گەكتاردى الىپ جاتقان شاڭعى بازاسى ىسكە قوسىلسا، ەكىنشى كەزەڭدە 90 جانە 125 مەترلىك تۇعىردان سەكىرۋ نىسانى قولدانىسقا بەرىلدى.

ايتا كەتەيىك، اتالعان سپورت كەشەنىن سالۋعا بارلىعى 38 ميلليارد تەڭگە قارجى جۇمسالدى. شاڭعى بازاسى قىسقى سپورت تۇرلەرى (شاڭعى جارىسى، بياتلون، تۇعىردان سەكىرۋ) بويىنشا الەمدىك تالاپتارعا ساي سالىنعان. نىسانعا شاڭعى جولى، 90 جانە 125 مەترلىك بيىكتىكتەن سەكىرۋ تۇعىرى (ترامپلين)، 200 ورىندىق قوناق ءۇيى، 250 ورىندىق اسحانا، ءجۇزۋ باسسەينى، دارىگەرلىك-ساۋىقتىرۋ ورتالىعى كىرەدى.