ەلباسى تۇركىستان وبلىسىنىڭ اكىمى مەن حالقىنا العىس ءبىلدىردى

تۇركىستان وبلىسى. قازاقپارات - مەملەكەت باسشىسى نۇرسۇلتان نازاربايەۆ تۇركىستان وبلىسىنىڭ اكىمى جانسەيىت تۇيمەبايەۆ پەن ءوڭىر تۇرعىندارىنا العىس حات جولدادى، دەپ حابارلايدى قازاقپارات ءتىلشىسى.

حاتتا ەلباسى استانانى كوركەيتۋگە قوسقان ۇلەسى ءۇشىن تۇركىستان وبلىسىنىڭ اكىمى مەن ءوڭىر تۇرعىندارىنا شىنايى ريزاشىلىعىن بىلدىرگەن.

«وڭىرلەردىڭ استاناعا تارتۋى» جوباسى اياسىندا تۇركىستان وبلىسى دا ەلورداعا ەرەكشە سىي جاسادى. ۇزاق قاشىقتىقتى قامتيتىن جانە تولىق جابدىقتالعان ۆەلوسيپەد جولاعى ادامدارعا ارنالعان قالاداعى زاماناۋي ورتانىڭ ماڭىزدى قۇرامداس بولىگى سانالادى. بۇل ۆەلوسيپەد جولاعى سالاماتتى ءومىر سالتىن ناسيحاتتاپ، ەلوردادا جاپپاي سپورتپەن شۇعىلدانۋ ءۇردىسىن دامىتۋعا سەپتىگىن تيگىزەتىن بولادى. استانانى كوركەيتۋگە زور ۇلەس قوسقان سىزگە جانە ءوڭىر تۇرعىندارىنا شىنايى ريزاشىلىعىمدى بىلدىرەمىن»، - دەلىنگەن العىس حاتتا.

ايتا كەتەيىك، استانانىڭ 20 جىلدىعىنا وراي ءبىرقاتار وبلىستاردىڭ اتسالىسۋىمەن ەلوردادا جاڭادان 56 شاقىرىم ۆەلوجول سالىنعان بولاتىن. «وڭىرلەردىڭ استاناعا تارتۋى» جوباسى اياسىندا ەسىل وزەنىنىڭ جاعالاۋىنان د. قونايەۆ كوشەسىندەگى كوپىرگە دەيىنگى ارالىقتا جۇرگىزىلگەن ۆەلوسيپەد جولى تۇركىستان وبلىسىنىڭ اتسالىسۋىمەن جۇزەگە اسقان بولاتىن. بۇل جول ەسىل وزەنىنىڭ بويى مەن سول جاعالاۋى جانە ەكسپو كەشەنىنىڭ نىساندارى ارقىلى وتەدى. ول قالالىق ساياباقتاعى شاڭعى جانە روليككە ارنالعان جول مەن يلينكا كەنتىنەن «جاسىل بەلدەۋ» ارقىلى وتەتىن ۆەلوسيپەد جولاقتارىن بايلانىستىرادى. ۆەلوترەكتەر ارنايى ۇستەلدەرمەن، تۇراقتارمەن، wi-fi جانە تەلەفوندى قۋاتتاۋ مۇمكىندىگى قاراستىرىلعان «اقىلدى ينفراقۇرىلىممەن» جابدىقتالعان.

اۆتور: اينۇر اقبايەۆا