استانادا تۇركى تىلدەس ەلدەردىڭ راديو وداعىن قۇرۋ ۇسىنىلدى

استانا. قازاقپارات - استانادا ءوتىپ جاتقان «ازيا مەديا ديالوگى» فورۋمىنا «قازاق راديولارى» ج ش س باس ديرەكتورى ءمادي ماناتبەك ۇلى تۇركى تىلدەس ەلدەردىڭ راديو وداعىن قۇرۋدى ۇسىندى، دەپ حابارلايدى قازاقپارات ءتىلشىسى.

«ناقتى راديوۇيىم اياسىنا بىرىكسەك بارىمىزگە دە ءتيىمدى بولار ەدى. العاشقى قادام رەتىندە تۇركى تىلدەس ەلدەردىڭ راديو وداعىن قۇرۋدى ۇسىنامىن. بۇل بارلىعىمىزعا وسى مەملەكەتتەردەگى سوڭعى جاڭالىقتاردان، وزگەرىستەردەن جانە باسقا دا مەديا ترەندتەردەن دەر كەزىندە حاباردار بولۋعا مۇمكىندىك بەرەدى»، - دەدى ءمادي ماناتبەك ۇلى قازمەديا ورتالىعىندا وتكەن كەزەكتى جيىندا.

ونىڭ ايتۋىنشا، راديونارىقتاعى جاڭالىقتاردان قالماۋ ءۇشىن مەنەدجەرلەردىڭ ءار جاڭالىقتى باقىلاپ، ساراپتاپ وتىرۋى، تىڭدارماننىڭ قالاۋىن ءدوپ باسۋى جانە ولارعا قاجەت جاڭا جوبالاردى ۇسىنا ءبىلۋى وزەكتى بولىپ وتىر.

«تاجىريبە الماسۋ ارقىلى ماماندارىمىزدىڭ كاسىبي بىلىكتىلىگىن ارتتىرا الامىز. ول ءۇشىن مامانداردىڭ كاسىبي بىلىكتىلىگىن ۇنەمى ترەنينگ، سەمينار ارقىلى ارتتىرىپ وتىرۋ كەرەك. مەنىڭ ويىمشا، اتالعان ماسەلەنى وسى فورۋم اياسىندا ارىپتەستىك مەموراندۋمدارىنا قول قويۋ ارقىلى شەشۋگە بولادى»، - دەدى راديولار باسشىسى.

قازاق راديولارىنىڭ حالىقارالىق بايلانىستاعى جەتىستىكتەرى از ەمەس. بۇگىندە «قازاق راديولارى» تۇركيالىق «ТRT» تەلەراديو كورپوراتسياسىنا قاراستى «تۇركيا راديولارى» باسقارماسىمەن ارىپتەستىك كەلىسىم جاساعان. ەندى جىل سايىن سەرىكتەستىك قىزمەتكەرلەرى تۇركيادا اقىسىز تاجىريبەدەن وتە الادى.

«ورتاق كەلىسىم ناتيجەسىندە «قازاق راديوسى» ازىرلەگەن، حالقىمىزدىڭ سالت-ءداستۇرى مەن ءان- كۇيىن ناسيحاتتايتىن «تۇركىستاننان تارتۋ» باعدارلاماسى «تۇركيا ءۇنى» راديوسىنىڭ ەفيرىنەن شىعا باستادى. تۇركيالىق ماماندار قازاق تىلىندە دايىنداپ بەرەتىن «انادولى تىنىسى» حابارى «قازاق راديوسىنىڭ ەفيرىنەن بەرىلىپ ءجۇر. باعدارلاما ماقساتى - تۇركياداعى قازاقتاردىڭ ءومىر سالتىمەن، ەكى مەملەكەت اراسىنداعى مادەني ءىس-شارالارمەن تانىستىرۋ. ودان بولەك، قىرعىزستان، وزبەكستان جانە ازىربايجانمەن بىرلەسكەن جوبالار دايىنداۋ بويىنشا كەلىسسوزدەر جۇرگىزىلىپ جاتىر. مۇنىڭ بارلىعى - ەكىجاقتى شارالار، ال ناقتى راديوۇيىم اياسىنا بىرىگۋ كەلەر كۇننىڭ ەنشىسىندە»، - دەدى ءمادي ماناتبەك ۇلى.

ايتا كەتەيىك، «قازاق راديولارى» ج ش س مەن ۆەتنامدىق VOV3 مۋزىكالىق ارناسىنىڭ ۋاعدالاستىعى بويىنشا، قازاقتىڭ كۇيلەرى مەن حالىق اندەرى ۆەتنام راديوسىندا اۋەلەيدى. ال قازاق راديوسى تىڭدارماندارعا بەيمالىم بولىپ كەلگەن ۆەت حالقىنىڭ اۋەندەرىن تانىستىرادى.