ازيا ويىندارىنىڭ اشىلۋىندا قازاقستان تۋىن كىم كوتەرىپ شىعادى؟
بۇل تۋرالى قازاقستان ۇلتتىق وليمپيادالىق كوميتەتىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات.
«ماعان ۇلتتىق وليمپيادالىق كوميتەتتەن بۇگىن عانا قوڭىراۋ شالدى. وسىعان دەيىن بايراقتى كوتەرىپ شىعۋعا ۇمىتكەرلەر قاتارىندا ەكەنىمدى دە بىلگەن جوقپىن. ارينە، كەز كەلگەن سپورتشى ءۇشىن بۇل ۇلكەن باقىت! ازيا ويىندارىنىڭ اشىلۋ سالتاناتىندا قازاقستان بايراعىن ماعان سەنىپ تاپسىرعانى ءۇشىن قۋانىشتىمىن. جارىس كەزىندە ءبىزدىڭ كوك تۋىمىز سان مارتە كوكتە جەلبىرەيتىنىنە دە سەنىمدىمىن. بارلىق سپورتشىلار جىلدىڭ باستى دوداسىنا قارقىندى دايىندالىپ جاتىر. جاقسى ناتيجە كورسەتىپ، بارشا قازاقستاندىق جانكۇيەرلەردى قۋانتامىز دەگەن ويدامىن»، - دەيدى بۇل كۇندەرى الماتى وبلىسىنداعى بۇكىل الەمدىك بوكس اكادەمياسىندا ۇلتتىق قۇرامامەن بىرگە جاتتىعۋ جيىندارىندا جۇرگەن ءابىلحان امانقۇل.
قازىرگى تاڭدا قازاقستان ۇلتتىق قۇراماسى 2018-جىلدىڭ 18- تامىزى مەن 2 قىركۇيەگى ارالىعىندا دجاكارتادا وتەتىن جازعى ازيا ويىندارىنا دايىندالۋدا. قازاقستان قۇراماسىنىڭ اتلەتتەرى 38 سپورتتىق ديستسيپلينا بويىنشا 25 وليمپيادالىق سپورت تۇرىندە سىنعا تۇسپەك. بارلىعى 419 سپورتشى جارىس جولىنا شىعادى دەپ كۇتىلۋدە.
ازيا ويىندارىندا جالپى ەسەبى 462 مەدال جيىنتىعى ساراپقا سالىنادى، ونىڭ ىشىندە 332 جۇلدە وليمپيادالىق سپورت تۇرلەرىنەن ءوز يەسىن تاپپاق.
ءابىلحان امانقۇل 1997-جىلدىڭ 29- شىلدەسىندە جامبىل وبلىسىندا دۇنيەگە كەلگەن. بوكستان قازاقستان ۇلتتىق قۇراماسىنىڭ مۇشەسى، قازاقستان رەسپۋبليكاسىنىڭ سپورت شەبەرى. 2017-جىلعى الەم چەمپيوناتىنىڭ كۇمىس جۇلدەگەرى (گامبۋرگ، گەرمانيا). 75 كەلىگە دەيىنگى سالماق دارەجەسىندە سىنعا تۇسەدى. جاس وسپىرىمدەر اراسىنداعى بىرنەشە تۋرنيرلەردىڭ چەمپيونى، قازاقستان چەمپيونى (2016)، گەرمانيادا وتكەن حالىقارالىق گاللە تۋرنيرىنىڭ جەڭىمپازى، ازيا چەمپيوناتىنىڭ قولا جۇلدەگەرى (2017).