استانادا قىلمىس ورنىن ءدال انىقتايتىن تەحنولوگيا تانىستىرىلدى
«قازىر ەكى جۇيە نەگىزىندە جۇمىس جاسايمىز - «تاۋەكەلدەر كارتاسى» جانە «اقىلدى ەسەپ». وسى جوبا شەڭبەرىندە «قۇقىق بۇزۋشىلىقتار كارتاسى» مودۋلىن جۇزەگە اسىرۋدى جوسپارلاپ وتىرمىز. مودۋلدە «اقىلدى تورۋىل» جوباسىن قۇرامىز، ءسويتىپ «قۇقىق بۇزۋشىلىقتار كارتاسىن» ودان ءارى جەتىلدىرە تۇسەمىز، «ە- كۋاگەر» كامەراسىن ينتەگراتسيالايمىز. مۇنىڭ قانداي ماڭىزى بار؟ پوليتسەيلەردىڭ قىلمىس ىزدەۋ مارشرۋتتارىن انىقتاۋ ءۇشىن قىلمىس جاسالۋ تاۋەكەلى بار ايماقتاردى، ۋاقىتىن جانە باسقا دا فاكتىلەرىن كورسەتەتىن مودۋل قۇرىلادى»، - دەدى باس پروكراتۋرادا ق. جاقىپبايەۆ ارىپتەستەرىنە.
ول «قۇقىق بۇزۋشىلىقتار» جۇيەسىن انىقتاۋ ءۇشىن قىلمىس ورنى مەن ۋاقىتى ءدال كورسەتىلگەن اقپاراتتى الۋ اسا ماڭىزدى ەكەنىن اتاپ ءوتتى.
«قىلمىس تۋرالى مالىمەتتەرگە سۇيەنە وتىرىپ، «قۇقىق بۇزۋشىلىقتار» كارتاسىنىڭ بەلگىلى ءبىر ورىن ماڭىندا شوعىرلانعانىن كورەمىز، ونى بەينەلى تۇردە «قىلمىس وشاقتارى» دەپ اتاۋعا بولادى. قىلمىس جاقىن ماڭداعى باسقا ورىندا بولسا، تەرگەۋشىلەر قىلمىستى زەرتتەگەندە، قىلمىس ورنى دەپ سول ماڭداعى ءۇيدى كورسەتەدى. مىسالى، «ءانشى فونتان» جانىندا قالتا ۇرلىعى ورىن العاندا، كارتا «نۇرسايا» تۇرعىن ءۇي كەشەنىن كورسەتتى، - دەپ اتاپ ءوتتى باس پروكۋراتۋرا وكىلدەرى.
ونىڭ سوزىنشە، جاڭا تەحنولوگيالار وتە قاراپايىم تۇردە قولدانىلاتىن بولادى.
«ەندى تەرگەۋشىلەر «قۇقىق بۇزۋشىلىقتار» كارتاسىنا كىرىپ، وقيعا ورنىن تاڭداسا، جاڭا تەحنولوگيالار قىلمىستىڭ ورنىن سانتيمەترىنە دەيىن ءدال كورسەتىپ بەرەدى. سايكەسىنشە، بۇل قالانىڭ قاۋىپسىزدىگىن دۇرىس جوسپارلاۋعا الىپ كەلەدى»، - دەپ اتاپ ءوتتى ق. جاقىپبايەۆ.