قازاقستاندىق شىعارمالار قىتاي تىلىنە اۋدارىلادى

بەيجىڭ. قازاقپارات - «بولاشاققا باعدار: رۋحاني جاڭعىرۋ» باعدارلاماسىن جۇزەگە اسىرۋ اياسىندا ق ح ر- داعى ق ر ەلشىسى شاحرات نۇرىشيەۆ «سينسين» باسىلىمىنىڭ ديرەكتورى ما جۋتسزيۋنمەن باسپا ءىسى سالاسىنداعى ىنتىماقتاستىقتىڭ بولاشاعىن تالقىلادى، دەپ حابارلايدى «قازاقپاراتتىڭ» قىتايداعى مەنشىكتى ءتىلشىسى.

تاراپتار قازاق ادەبيەتى مەن مادەنيەتىن شەتەلدە ناسيحاتتاۋ ماقساتىندا بەلگىلى قازاقستاندىق اۆتورلاردىڭ كىتاپتارىن قىتاي تىلىنە اۋدارۋ جانە ولاردى ق ح ر اۋماعىندا باسىپ شىعارۋ ماسەلەلەرى بويىنشا پىكىر الماستى.

«نۇرلى جول» جانە «ءبىر بەلدەۋ، ءبىر جول» باستامالارى اياسىندا «ۇلى جىبەك جولىنىڭ بويىنداعى ءجۇز قالا» جوباسىن جۇزەگە اسىرۋ جايى ءسوز بولدى.

«ەجەلگى جىبەك جولىنىڭ بويىندا ورنالاسقان قازاقستاندىق قالالار باي مادەنيەتكە جانە داستۇرگە يە. مىسالى، الماتى، تاراز جانە تۇركىستان قالالارىنىڭ تاريحى تەرەڭدە جاتىر. ولار ۇلى جىبەك جولىنداعى ساۋدا-ساتتىق پەن مادەني ايىرباستى دامىتۋدا ماڭىزدى ءرول ويناعان»، - دەپ اتاپ ءوتتى ش. نۇرىشيەۆ.

ما جۋتسزيۋن وسى جوبانىڭ ءساتتى جۇزەگە اسىرىلۋى قىتايلىق اۋديتورياعا قازاقستاننىڭ تاريحي كورنەكتى ورىندارى تۋرالى اقپارات بەرۋگە جانە قازاقستانعا كوپ قىتايلىق تۋريستەردى تارتۋعا مۇمكىندىك بەرەتىنىن اتاپ ءوتتى.

«سينسين» - باسپا ءىسى جانە شەتەل تىلدەرىنە ادەبيەت تاراتۋ بويىنشا ق ح ر باسقارماسىنا قاراستى مەملەكەتتىك باسىلىم. باسىلىم 1989-جىلى سىرتقى ناسيحات بويىنشا اگەنتتىك رەتىندە قۇرىلعان. جىل سايىن ءارتۇرلى تىلدەردە 230 دان استام كىتاپ جارىق كورەدى.