استانا تابىستى وڭىرلەردىڭ كوشىن باستادى
«ءبىر جىلدىڭ ىشىندە ەلوردادا سىرتقى ينۆەستيتسيا كولەمى 7,4 ەسە ارتىپ، 101,3 ميلليارد تەڭگەگە جەتىپ وتىر. بيۋجەتتىڭ كىرىس بولىگىندەگى سالىق تۇسىمدەرىنىڭ ۇلەس سالماعى 38,4 پايىزدان 63,3 پايىزعا جوعارىلادى. سوڭعى 10 جىلدىڭ ىشىندە 2017 جىل استانا بيۋجەتىنىڭ كىرىسى ءۇشىن رەكوردتىق كورسەتكىش بولدى. ول 2016-جىلعى 405,9 ميلليارد تەڭگەدەن 469,4 ميلليارد تەڭگەگە دەيىن جەتتى»، - دەلىنگەن تاراتىلعان مالىمەتتە.
2014-جىلعا دەيىن قالا بيۋدجەتىن تولىقتىرۋداعى نەگىزگى كوزى ترانسفەرت بولىپ كەلدى. ونىڭ داعدارىسقا تولى بولعان 2008-جىلى 74,5, ال 2014-جىلى 55,8 پايىزدى قۇراسا، سالىق تۇسىمدەرىنىڭ ۇلەسى 40 پايىزدان اسپاعان ەدى.
«دەگەنمەن، استانانىڭ بيۋدجەتتىك سۋبسيديالاۋعا تاۋەلدىلىگى تومەندەپ كەلە جاتىر. 10 جىلدىڭ ىشىندە ترانسفەرتتەردىڭ سالماعى 2017-جىلدىڭ سوڭىنا قاراي 48 پايىزعا دەيىن قىسقاردى. ال 2018-جىلدىڭ قاڭتار-ساۋىرىندە تراسفەرتتەر نە ءبارى 38,4 پايىز بولسا، سالىق تۇسىمدەرى 63,3 پايىزعا جەتتى. سوڭعى جىلدارى استانا ىشكى، سونىمەن قاتار سىرتقى كاپيتال ءۇشىن دە ينۆەستيتسيالىق ماگنيتكە اينالىپ وتىر. 2018-جىلدىڭ قاڭتار- مامىرىنداعى ەلوردانىڭ نەگىزگى كاپيتالىنىڭ جيىنتىعىنداعى ينۆەستيتسيا 335,4 ميلليارد تەڭگەنى قۇرادى. بۇل سومانىڭ ىشىندە نەگىزگى كاپيتالعا سالىنعان سىرتقى ينۆەستيتسيانىڭ ۇلەسى 30,2 پايىزعا (101,3 ميلليارد تەڭگە) تەڭ»، - دەپ اتاپ وتىلگەن تالداۋدا.
ەلوردانىڭ نەگىزگى كاپيتالىن سىرتتاي قورلاندىرۋدىڭ رەكوردتىق ءوسىمى كوپ جاعدايدا «ەكسپو-2017» حالىقارالىق مامانداندىرىلعان كورمەسىن تابىستى وتكىزۋمەن، سونىمەن قاتار «استانا» حالىقارالىق قارجى ورتالىعىنىڭ ەل ەكونوميكاسىنا ينۆەستيتسيا تارتۋ جونىندەگى بەلسەندى قىزمەتىمەن بايلانىستى.
ساراپشىلاردىڭ ايتۋىنشا، 2017-جىلى قارجى ورتالىعى اياسىندا 10 ەلمەن مەموراندۋمدار مەن كەلىسىمدەرگە قول قويىلعان.
2017-جىلدىڭ قورىتىندىسىندا استانانىڭ جالپى وڭىرلىك ءونىمى 5,8 تريلليون تەڭگەنى قۇرادى. بۇل ءبىر جىل بۇرىنعى 4,9 تريلليون تەڭگەدەن 18,5 پايىزعا كوپ.