الماتىدا «ۇلى دالا ەلى» فەستيۆالىندە ورتالىق ازيا جىرشىلارى باس قوستى
جىراۋلار پوەزياسى «ۇلى دالا ەلى» فەستيۆالىندە جاڭعىردى، دەپ حابارلايدى قازاقپارات ءتىلشىسى.
«الاتاۋ» ءداستۇرلى ونەر تەاترىندا حالىقارالىق «ۇلى دالا ەلى» فەستيۆالى ۇيىمداستىرىلدى. ءداستۇرلى ەپوس فەستيۆالىنىڭ بيىلعى باعدارلاماسى استانانىڭ 20 جىلدىق مەرەيتويىنا ارنالدى.
قازاقستاندىق جىرشىلارمەن بىرگە قىرعىزستان، وزبەكستان، قاراقالپاقستاننان كەلگەن جىر ورىنداۋشىلار دالا اۋەنىن ساحنادان سارناتتى.
فەستيۆالگە كەلگەن 14 قاتىسۋشى قىرعىزدىڭ «ماناس» جىرىن، تۇركىنىڭ «تەكەي باتىر»، «الپامىس» داستاندارىن ورىندادى.
«قىرعىزستاندىق ايگىلى جىرشى دوولەتبەك سادىكوۆ «ماناس» ەپوسىن، وزبەكستاننان كەلگەن ابدىنازار پويانوۆ «الپامىس» ەپوسىن ورىندادى. سونداي-اق قاراقالپاقستاننان دينارا نۇراتدينوۆا اتتى جاس باقسى كەلدى. تۇركى حالىقتارىنا ورتاق جىراۋلىق ءداستۇر فەستيۆالىنىڭ الماتىدا ءوتۋى تەگىن ەمەس. جەتىسۋ جەرىندە كوشپەندى حالىقتىڭ تابانىنىڭ ءىزى قالعان. ەجەلدەن كەلە جاتقان جىراۋلار پوەزياسى بۇگىن دە ماڭىزعا يە»، - دەدى قازاقستاندىق جىرشى ۇلجان بايبوسىنوۆا.
ونىڭ ايتۋىنشا، جىرشىلىق ءداستۇر قازاقستاننىڭ وڭتۇستىك پەن باتىس ايماقتارىندا ساقتالعان.
«جىرشىلىق ونەر قىزىلوردا وبلىسىندا كەڭ تاراعان. ول جاقتا جىرشىلىق ونەرى اتادان بالاعا، ۇستازدان شاكىرتكە بەرىلەدى. ماڭعىستاۋ وبلىسىندا دا بۇل ءداستۇر ساقتالعان. الماتىنىڭ جەتىسۋ اۋدانىندا ۇرپاقتارعا تۇركى حالقىنىڭ مۋزىكاسىن دارىپتەيتىن ورتالىق بار»، - دەدى ول.
قاتىسۋشىلار 7 مينۋتتان ءبىر جارىم ساعاتقا دەيىن سوزىلاتىن ەپوستاردى ورىندادى.
«بۇل جولى ەپيكالىق شىعارمالار مەن قاھارماندار تۋرالى اڭىزدار، داستاندار ايتىلدى. جىلدان جىلعا ولاردىڭ ورىندالۋ مانەرى وزگەرىپ، مازمۇندىراق بولىپ كەلەدى»، - دەدى فەستيۆالدىڭ سەناري اۆتورى بازاربەك اتىعايەۆ.
«رۋحاني جاڭعىرۋ» اياسىندا جۇزەگە اسقان فەستيۆال تۇركى حالىقتارىنىڭ ەجەلگى مۇراسى - جىراۋلىق ءداستۇردىڭ ۇمىتىلماۋىن مۇرات ەتەدى.
