11:23, 07 - شىلدە 2018 | GMT +6
دونالد ترامپ: قازاقستان مەن ا ق ش اراسىنداعى ستراتەگيالىق ىنتىماقتاستىق ودان ءارى تەرەڭدەي ءتۇستى
استانا. قازاقپارات - نۇرسۇلتان نازاربايەۆقا امەريكا قۇراما شتاتتارىنىڭ پرەزيدەنتى دونالد ترامپتان استانانىڭ 20 جىلدىعىنا جانە تۋعان كۇنىنە وراي قۇتتىقتاۋ حات كەلىپ ءتۇستى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
دونالد ترامپ قازاقستان پرەزيدەنتىنىڭ اتىنا جولداعان قۇتتىقتاۋ حاتىندا بيىلعى قاڭتاردا اق ۇيدە وتكەن كەزدەسۋ بارىسىندا جەكە دوستىق قارىم- قاتىناستىڭ نىعايعانىنا ريزاشىلىق ءبىلدىرىپ، ەكى ەل اراسىنداعى ستراتەگيالىق ىنتىماقتاستىق ودان ءارى تەرەڭدەي تۇسكەنىن اتاپ ءوتتى.
- تۋعان كۇنىڭىزگە وراي سىزگە زور دەنساۋلىق، اماندىق پەن باق- بەرەكە تىلەيمىن. سونداي- اق، قازاقستان حالقىن استانانىڭ 20 جىلدىق مەرەيتويىمەن شىن جۇرەكتەن قۇتتىقتايمىن.
ءسىزدىڭ باسشىلىعىڭىزبەن «ەكسپو-2017» كورمەسىن تابىستى وتكىزگەن استانا قازاقستاننىڭ قارقىندى دامىپ كەلە جاتقان ورتالىعىنا اينالعانىن كورسەتتى جانە بولاشاق ۇرپاق ءۇشىن ماڭگىلىك مۇرا بولىپ قالا بەرمەك، - دەلىنگەن قۇتتىقتاۋ حاتتا.