تالدىقورعاندا «استانا» داڭعىلى اشىلدى
سونىمەن قاتار وسى كۇنى اسا كورنەكتى قازاق تاريحشىسى قادىرعالي جالايريدىڭ، ەڭبەك ەرلەرى بايكەن ءاشىموۆ پەن زىليحا تامشىبايەۆنىڭ اتىنا كوشەلەر بەرىلدى، - دەپ حابارلايدى قازاقپارات ءتىلشىسى.
سالتاناتتى راسىمدەر وبلىس اكىمىنىڭ قاتىسۋىمەن ءوتتى. الدىمەن قادىرعالي جالايري داڭعىلىن اشۋدان باستالعان شارادا اماندىق باتالوۆ ءوڭىر زيالىلارىمەن جانە ارداگەرلەر قاۋىمىمەن بىرگە قالانىڭ جاڭا شاعىن اۋدانىنان ب. ءاشىموۆ پەن ز. تامشىبايەۆانىڭ اتىنا بەرىلگەن كوشەلەرگە جانە قالاعا كىرەبەرىستە جاڭادان ورناتىلعان اركاعا دا اتباسىن بۇردى. سونداي-اق استانا داڭعىلىنىڭ اشىلۋ سالتاناتىنا قاتىسىپ، داڭعىلدىڭ لەنتاسىن ارداگەرلەرمەن جانە استانامەن قۇرداس جاستارمەن بىرگە قيدى. ءوز قۇتتىقتاۋىندا وبلىس اكىمى استانا كۇنىن مەرەكەلەۋدىڭ ماڭىزىنا قىسقاشا توقتالدى.
«وسىنداي اتاۋلى مەرەكە قارساڭىندا وبلىس اۋماعىندا كوپتەگەن ءىس-شارالار وتكىزىلۋدە. سونداي شارانىڭ ءبىرى، بۇگىنگى ەلوردامىز - استانانىڭ 20 جىلدىعى قارساڭىندا «استانا» داڭعىلىنىڭ سالتاناتتى اشىلۋى بولىپ وتىر. سونىمەن قاتار، ۇلى تۇلعالارىمىزدىڭ ۇلاعاتتى ەڭبەگى مەن ەرلىككە تولى ەرەن ىستەرىن اسپەتتەۋ ماقساتىندا، عۇلاما تاريحشى قادىرعالي جالايري داڭعىلى، ەڭبەك ەرلەرى بايكەن ءاشىموۆ پەن زىليحا تامشىبايەۆانىڭ قۇرمەتىنە كوشە اتتارى بەرىلدى»، - دەدى ا. باتالوۆ.
وبلىستاعى زيالى قاۋىم وكىلدەرى، ارداگەرلەر، قالا تۇرعىندارى قاتىسقان سالتاناتتى جيىندا تالدىقورعان قالالىق ارداگەرلەر كەڭەسىنىڭ ءتوراعاسى م. حالىق، بايكەن ءاشىموۆتىڭ ۇلى و. ءاشىموۆ، زىليحا تامشىبايەۆانىڭ قىزى س. توقسانباي قىزى ءسوز الىپ بۇگىنگى اتقارىلىپ وتىرعان تاعىلىمدى ىسكە ريزاشىلىقتارىن جەتكىزىپ، كوپشىلىكتى استانا مەرەكەسىمەن قۇتتىقتادى.
