سىزدەر ديماشپەن ماقتانا الاسىزدار - ءانشىنىڭ شەتەلدىك جانكۇيەرلەرى

استانا. قازاقپارات - قازاقستاندىق ءانشى ديماش قۇدايبەرگەننىڭ الەمنىڭ تۇكپىر-تۇكپىرىندەگى شەتەلدىك تىڭدارماندارى استانا كۇنىمەن قۇتتىقتاپ، ۆيدەوروليك جولدادى، دەپ حابارلايدى قازاقپارات.

«سالەم، استانا!» دەپ باستالاتىن قۇتتىقتاۋلاردا قازاقستان ەلورداسىنىڭ 20 جىل ىشىندە سالىنىپ، سۇلۋ قالاعا اينالعانى، ديماشتىڭ ءانى دۇنيە جۇزىندەگى انسۇيەر قاۋىمنىڭ باسىن قوسىپ وتىرعانى ايتىلعان.

«سالەم، استانا! قالانىڭ 20 جىلدىعىمەن قۇتتىقتايمىن! ءسىزدىڭ قالاڭىز ءارقاشان گۇلدەنىپ، دامي بەرسىن! مەرەيتوي قۇتتى بولسىن!»، - دەيدى «ديماش- ا ق ش» فان-كلۋبىنىڭ اتىنان اليسا كەللوگ.

ديماش قۇدايبەرگەننىڭ پولشاداعى فان- كلۋبىنىڭ اتىنان قۇتتىقتاۋ ارناعان مونيكا ۆاسيليەۆسكا: «استانا - قارقىنمەن دامىپ كەلە جاتقان سۇلۋ قالا. سىزدەرگە قالاڭىز وسە بەرسىن دەيمىز! سىزدەر تەك قارقىندى دامۋمەن عانا ەمەس، تانىمال ءانشى ديماشپەن دە ماقتانا الاسىزدار! 20 جىلدىق مەرەيتوي قۇتتى بولسىن!»، - دەيدى.

رۋمىنيا، تۇركيا، يندونەزيا، جاپونيا، ياكۋتيا، بەلارۋس، بولگاريا، ۋكراينا، فرانسيا، رەسەي ەلدەرىندەگى جانكۇيەرلەر دە جىلى لەبىزدەرىن ءبىلدىرىپ جاتتى. ودان باسقا، ەۋرازيا فان- كلۋبى، ءيسپانتىلدى تىڭدارماندار، حالىقارالىق جانكۇيەرلەر فان-كلۋبتارى دا شىنايى لەبىزدەرىن جەتكىزدى.

ەسكە سالايىق، ديماش قۇدايبەرگەن وتكەن جىلى قىتايدىڭ «Singer2017» ءان بايقاۋىنا قاتىسىپ 2-ورىندى جەڭىپ الدى. سونداي-اق، وتانداسىمىزدىڭ ەرەكشە داۋىسى قىتايلىق تىڭدارمانداردىڭ جۇرەگىن جاۋلاپ، از ۋاقىتتا سول ەلدەگى ەڭ تانىمال انشىگە اينالدى.