اقتوبەلىكتەر قان قىسىمىن ولشەۋدەن گيننەستىڭ رەكوردىن جاڭارتۋعا جينالىپ جاتىر

اقتوبە. قازاقپارات - اقتوبەدە ءبىر مەزەتتى 500 دارىگەر تۇرعىنداردىڭ قان قىسىمىن ولشەيدى. ءسويتىپ 2015 -جىلى ءۇندىستاندا تىركەلگەن گيننەسس رەكوردى جاڭارادى، دەپ حابارلايدى قازاقپارات ءتىلشىسى.

استانا قالاسىنىڭ 20 جىلدىعىنا وراي اقتوبەنىڭ دارىگەرلەرى گيننەسس رەكوردىن جاڭارتۋدى قولعا الدى. «دەنساۋلىق» ساياباعىنا بارلىعى 500 دارىگەر جينالىپ، ولار ءبىر مەزەتتە قالا تۇرعىندارىنىڭ قان قىسىمىن ولشەۋگە دايىندالىپ جاتىر. ءسويتىپ، 1 ساعاتتا 4 مىڭ ادامنىڭ قان قىسىمىن ولشەۋ تاپسىرماسى ورىندالدى.

 

ۇيىمداستىرۋشىلاردىڭ ايتۋىنشا، گيننەسس رەكوردىن جاڭارتۋ ءۇشىن 18 جاستان 60 جاسقا دەيىنگى ادامدار الدىن الا شاقىرىلدى. بۇل اكسياعا وبلىس اكىمدىگى جانە اكىمدىكتىڭ قۇرىلىمدىق بولىمشەلەرى بەلسەندى قاتىستى. ال وبلىستىق دەنساۋلىق ساقتاۋ باسقارماسى الەمدىك گيننەسس رەكوردىن جاڭارتۋ تۋرالى ءوتىنىم بەردى.

ايتا كەتەيىك، قان قىسىمىن ولشەۋ رەكوردى 2015 -جىلى ءۇندىستاندا جاسالدى. ولار ءبىر ساعاتتا 3600 ادامنىڭ قان قىسىمىن ولشەدى.