اباي بەگەي ءوزىن سىناعاندارعا: مەن ادەيى جاس قىزعا ۇيلەنەيىن دەپ ىزدەمەدىم

  استانا. قازاقپارات - اباي بەگەي ءوزىن سىناعاندارعا جاۋاپ بەردى. ول باسىنان وتكەن حيكاياسىن بايانداپ، حالىقتى تۇسىنىستىك تانىتۋعا شاقىردى.

 جارى ومىردەن قايتقان سوڭ ءۇش جىل بويى قاتتى قايعىرعانىن، تەك كەيىننەن قىزدارىنا قۇربىداي سىرلاس بولا الاتىن جار ىزدەگەنىن اتاپ ءوتتى، دەپ جازادى Stan.kz اقپاراتتىق اگەنتتىگى.

«اسسالاۋماعالەيكۋم اعايىن! مەن جايىندا، مەنىڭ وتباسىم جايىندا ءبىراز اڭگىمەلەر بولىپ جاتىر ەكەن. جاقسى تىلەك بىلدىرۋشىلەرگە اللا رازى بولسىن. ال، تەرىس پىكىر جازىپ ۋشىقتىرۋشىلارعا ءمان- جايدى اشىپ ايتقىم كەلدى.

ءۇش جىل بۇرىن انام، تۋعان اعام، جان جارىم دۇنيەدەن ءوتىپ، ءبىراز ۋاقىت ەسەڭگىرەپ قالعان ەدىم. قينالدىم، قايعىردىم، قاجىدىم. «جالعىزدىق قۇدايعا عانا جاراسقان» دەۋشىلەر كوپ بولسا دا، ۇيلەنۋدەن باس تارتىپ ءجۇردىم. سەبەبى، قىزدارىم مەن ۇلىمنىڭ جۇرەگىنە اۋىر جارا سالۋدان قورىقتىم. ەشكىمدە انانىڭ ورنىنا انا بولا الماسىن ءتۇسىندىم.

ءبىراق، اللا بىزگە تاعدىردى جازعاندا جۇپ- جۇبىمىزبەن جاراتتى. مەن قانشا ۇيلەنۋدەن باس تارتسام دا ومىردە وتباسىنىڭ ۇيىتقىسى مەن بەرەكەسى بولار ءبىر قيسىق قابىرعانىڭ قاجەتتىگىن ءتۇسىندىم.

تۇڭعىشىم قۇتتى ورنىنا قوندى، ۇزاتىلدى شۇكىر. ناعاشىلارىنا العىسىم شەكسىز، ۇلىما انانىڭ ماحابباتىن بەرە الماسام دا، اكەلىك جول كورسەتىپ، جاقسى ازامات بولارىنا ۇلەس قوسا الارمىن. ال، كىشكەنتاي قوس قارلىعاشىما دۇرىس باعىت- باعدار، تاربيە بەرۋ ءۇشىن انانىڭ ورنىن باسا الماسا دا، قۇربىداي سىرلاس ايەل كەرەك. ويتكەنى، 10 جاستان باستاپ اكەسىنە ايتا المايتىن قىزداردىڭ قۇپياسى - سىرلارى باستالاتىنى انىق قوي. وتپەلى جانە ءجاسوسپىرىم شاعىندا جانىندا تابىلىپ، سىرلاساتىن، قولدايتىن يماندى جار ىزدەدىم.

مەنىڭ مارقۇم اكەم مەن انامنىڭ جاس ارالىعى 16 جاس. ومىرگە ەكى قىز، التى ۇل دۇنيەگە كەلگەن مەن كەنجەسىمىن. مەن ادەيى جاس قىزعا ۇيلەنەيىن دەپ ىزدەمەدىم، وسىلاي بولدى، 16 جاس.

جاس قىزعا ۇيلەندى دەپ سوگۋ دە ورىنسىز. سەبەبى، كىمنىڭ كىمگە جۇپ بولاتىنىن ءبىز انامىزدىڭ ىشىندە جاتقان كەزدە- اق اللا تاعدىرىمىزعا جازىپ قويعان. ەكى ادامدى كەزدەستىرەتىن دە، توعىستىراتىن دا - اللا. تويدى باي، تانىمال نەمەسە اقشامىز اسىپ- تاسىعاننان ەمەس، شاريعات بويىنشا جاريالاۋ ماقساتىندا جاسادىق. ومىردەگى، ونەردەگى تەك جاقىندارىمدى جينادىم.

ءسوز سوڭىندا ايتارىم، مەن ءبىر ايەلدىڭ ۇستىنە ءبىر ايەل الىپ نەمەسە ءبىرىنشى وتباسىمدى تاستاپ كەتىپ، ەكىنشى رەت ۇيلەنىپ وتىرعان جوقپىن. بۇل - تاعدىر. مەنىڭ قايعىمدى ەشكىمگە دە تىلەمەيمىن. مارقۇم بالالارىمنىڭ اناسى جاناتىما دەگەن قۇرمەتىم دە، ماحابباتىم دا ەرەكشە. تەك قۇران باعىشتاۋدان باسقا امالىم جوق. اللا جاتقان جەرىن جارىق قىلسىن.

ءتىرى ادام تىرشىلىگىن جاسايدى. بەس كۇندىك جالعاندا ءبىر بىرىمىزگە جاقسىلىق ويلاپ، تىلەكشى بولايىق. قالاي جاسساڭىزدار دا، مەن سىزدەردى جاقسى كورەمىن!

Stan.kz