شىمكەنتتە قانداي نىساندار سالىنادى

استانا. قازاقپارات - شىمكەنت قالاسىنىڭ اكىمى عابيدوللا ءابدىراحىموۆ الداعى جوسپارلارى جايىندا ايتىپ بەردى.

بۇگىن قالا باسشىسى استاناداعى جىبەك جولى ەلدەرى قالا مەرلارىنىڭ فورۋمىنا قاتىستى، دەپ حابارلايدى قازاقپارات ءتىلشىسى.

«شىمكەنت قالاسىنىڭ بيۋدجەتى 1 ميلليارد دوللاردان اسادى. ءبىراق رەسپۋبليكالىق مارتەبە العاننان كەيىن الداعى ۋاقىتتا اتالعان سوما ەكى ەسەگە وسەدى دەپ وتىرمىز. ال ايماقتىڭ جالپى ىشكى ونىمدەگى ۇلەسى شامامەن 6 ميلليارد دوللاردى قۇرايدى. جارتىسى ساۋدا- ساتتىققا تيەسىلى. ودان كەيىن ءوندىرىس پەن قۇرىلىس كەلەدى. ءبىز ءوز قالامىزدى تۋريزم، ساۋدا، ويىن- ساۋىق پەن تىنىعۋ ورتالىعى رەتىندە دامىتۋدى كوزدەيمىز. سوندىقتان كاسىبي مامانداردى شىكەنتتىڭ تۇجىرىمداماسى مەن ستراتەگياسىن ازىرلەۋگە شاقىرامىز»، - دەدى ع. ءابدىراحىموۆ.

قالا باسشىسىنىڭ ايتۋىنشا، شىمكەنت قالاسىنداعى باتىل جوسپارلاردىڭ ءبىرى - «Shymkentcity» جوباسى. اتالعان جوبا 400 گەكتار جەردە ورنالاسادى. بۇگىندە بارلىق كوممۋنيكاتسيالار تارتىلىپ، جولدار سالىندى. ورتالىق ساياباقتىڭ قۇرىلىسى باستالدى. ونىڭ اينالاسىندا تۇرعىن ۇيلەر مەن بيزنەس ورتالىقتار ورنالاسادى. «استانادا «حايۆيل» كومپانياسىنىڭ تۇرعىن ۇيلەرى بار. ءدال وسى كومپانيا بىزگە كەلىپ، باسپانا سالماقشى. ءبىز ولارعا 50 گەكتار جەر ءبولىپ بەردىك. بيىل قۇرىلىس جۇمىستارىن باستامايمىز دەپ وتىر. باسقادا ءىرى كومپانيالار شىمكەنتتە ءوز كەڭسەلەرىن اشۋعا كىرىستى. سوسىن جاقىن ارادا گولف پەن پولو الاڭدارىن سالۋدى جوسپارلاپ وتىرمىز. بۇدان بولەك، اكۆاپاركتەرجەلىسىن دامىتۋىمىز قاجەت. سەبەبى بىزدە شومىلۋ مەرزىمى ۇزاق. جازدا وتە ىستىق. جانىمىزدا تاۋلار بار. كەشكە قاراي سالقىندايدى. سوندىقتان قوناق ءۇي مەن مەيرامحانالاردى كوپتەپ سالامىز» - دەپ اتاپ كورسەتتى ع. ءابدىراحىموۆ.

ايتا كەتەيىك، قازاقپارات تىلىشىسىنە سۇحبات بەرگەن عابيدوللا ءابدىراحىموۆ قاراپايىم حالىقتىڭ جالاقىسىن دا كوتەرۋگە كۇش سالاتىنىن جەتكىزدى.