ءتىرى اداممىن: ماقپال ءجۇنىسوۆا وزىمەن دۋەت ايتقان جىگىتتەرگە عاشىق بولىپ قالۋدان قورقادى

 استانا. قازاقپارات - ماقپال ءجۇنىسوۆانىڭ پىكىرىنشە، ەر مەن ايەل ءانشىنىڭ ساحنادا بىرگە ونەر كورسەتۋى قالىپتى نارسە. الايدا قوس ونەر يەسى وبرازدى ساحنادا قالدىرىپ، سەزىمگە ەرىك بەرىپ كەتپەسە يگى، دەيدى حالىق ءارتيسى.

 سەبەبى ءدال ونەر ادامدارى ماحاببات سەزىمىنە ءجيى بوي الدىراتىن كورىنەدى.

بۇل تۋرالى ءجۇنىسوۆا 31 ارنانىڭ «ايتا بەرسىن» باعدارلاماسىنا بەرگەن سۇحباتىندا ايتتى، دەپ جازادى Stan.kz اقپاراتتىق اگەنتتىگى.

«ساحنادا انشىلەردىڭ جۇپتاسىپ ءان ايتۋىندا تۇرعان ەشتەڭە جوق، ءارى قاراي ءبۇلىنىپ كەتپەسە بولدى. ويىننان دا وت شىعادى دەپ، ونەر ادامدارى ماحاببات تۋرالى ءان ايتقاندا وبرازعا كىرىپ كەتەمىز عوي. سول كەزدە جۇپتاسىپ ءان ايتقان انشىلەرمەن تىم جاقىنداسپاۋ كەرەك. تەك قانا ساحنادا ءان ايتىپ قويۋ كەرەك. ولارمەن دوستاسىپ، قايتا- قايتا ۇيگە شاقىرىپ، كەزدەسىپ جۇرسەڭ، شىنايى ماحابباتقا ۇلاسىپ كەتۋى مۇمكىن. اسىرەسە، ونەر ادامدارى سەزىمگە تەز بەرىلەدى»، - دەپ اعىنان جارىلدى ماقپال مۇحامەديار قىزى.

ءدال وسى سەبەپتى حالىق ءارتيسى وزىمەن بىرگە ءان ايتقان ءانشى ازاماتتاردان بويىن اۋلاق ۇستايتىن كورىنەدى.

«مەن مىسالى، قانشاما جىگىتتەرمەن دۋەت ايتىپ ءجۇرمىن. جاسى بار، ورتاسى بار، وزىمنەن ۇلكەنى دە بار. ءبىراق مەن ەشقاشان ولاردى ۇيىمە شايعا شاقىرمايمىن، جاقىن ارالاسپايمىن. تەك قانا ساحنادا وبرازعا بەرىلۋىم مۇمكىن. ءبىراق ومىردە جاقىن ارالاسپايمىن. ويتكەنى مەن «زا سەبيا نە وتۆەچايۋ». مەن ءتىرى اداممىن، ول بالاعا عاشىق بولىپ قالۋىم مۇمكىن. ەرتەڭ وعان كۇيەۋگە شىعۋىم مىندەتتى ەمەس، ءبىراق جۇرەگىم اۋىرىپ قالۋى مۇمكىن. مەن ءوزىمدى قاتتى جاقسى كورەمىن، سوندىقتان دا جۇرەگىمدى اۋىرتقىم كەلمەيدى. مەنىڭ جاسىمدا، سىرتتاي عاشىق بولىپ جۇرگەنىم دە جەتكىلىكتى»، - دەپ ءتۇسىندىردى ول.