ەلباسى استانانىڭ جاسىل بەلدەۋى تۋرالى: بۋرابايداعى ورمانداي بولادى

استانا. قازاقپارات - مەملەكەت باسشىسى نۇرسۇلتان نازاربايەۆ استانا ماڭىنداعى جاسىل بەلدەۋلەر الداعى ۋاقىتتا قالاي نۋ ورمانعا اينالاتىنىن ايتىپ بەردى، دەپ حابارلايدى قازاقپارات ءتىلشىسى.

ايتا كەتسەك، بۇگىن نۇرسۇلتان نازاربايەۆ استانانىڭ اينالاسىنا ەگىلگەن جاسىل بەلدەۋدى ارالاپ، قىرعاۋىلداردى ەركىندىككە ۇشىرۋ شاراسىنا قاتىستى. مەملەكەت باسشىسى ورمان شارۋاشىلىعىنىڭ قىزمەتكەرلەرىنەن استانا ماڭىنا كوشەت وتىرعىزۋ جۇمىستارى قالاي جۇرگىزىلىپ جاتقانىن سۇرادى. جۇمىستىڭ يگى باعىتتا جالعاسىپ جاتقانىن كورگەن پرەزيدەنت بۇل شارۋالارعا كوڭىلى تولاتىنىن ءبىلدىردى.

اعاش وتىرعىزىلىپ، قىرعاۋىلدار ۇشىرىلعاننان كەيىن «جاسىل ەل» جاستارىنا ارناپ ءسوز سويلەگەن ەلباسى 20 جىلدىڭ ىشىندە استانا 1 ميلليون حالقى بار شاھارعا اينالعانىن اتاپ ءوتتى.

«استانا تانىمال قالا بولىپ قانا قويعان جوق، الەم ەلدەرى باسشىلارى كەلەتىن، سپورتتىق شارالار وتەتىن شاھار بولدى. ۇشاقپەن كەلە جاتقان كەزدە استانانىڭ توڭىرەگى قانداي ەكەنىن كورەتىن شىعارسىزدار. ءبىراق تا، مينيسترلەرگە سىن ايتاتىن دا جاعدايلار بار. جينالعاندا ايتارمىن ول تۋرالى. ءبىرىنشى وتىرعىزىلعان اعاشتار كوپ جەرلەردە وسپەي قالدى. سودان كەيىن اعاشتاردىڭ ءتۇرلى اۋرۋلارى بار. وعان ءتۇرلى حيميكاتتار، تىڭايتقىشتار كەرەك» ، - دەدى نۇرسۇلتان نازاربايەۆ.

پرەزيدەنت ءوز سوزىندە استانانى اينالا قورشاعا جاسىل بەلدەۋ ەل ءۇشىن جاسالىپ جاتقان كوپ شارۋالاردىڭ ءبىرى بولىپ سانالاتىنىن تىلگە تيەك ەتتى.

«ەلدىڭ استاناسى بولعاننان كەيىن وسىلاي بولۋ كەرەك. ماسكەۋدىڭ توڭىرەگىندە باياعىدان وسەتىن ورمان بار. كيەۆكە بارساڭ، تولعان ورمان. مينسكى دە تولعان ورمان. كەشە قازانعا باردىم - توڭىرەگىنىڭ ءبارى تابيعي ورمان. استانانىڭ باتىس جاعى بۇدان دا ادەمى. وسىنىڭ بارلىعى جاستار ءۇشىن، سەندەر ءۇشىن («جاسىل ەل» قاتارىنداعى جاستارعا قاراتا ايتتى - ا ۆ ت. ) ، بولاشاق ءۇشىن جاسالىپ جاتىر. مىنا ورمان كەرەمەت بولادى. بۇل اعاشتاردىڭ ساۋداسى 30-40 -جىلدان كەيىن بىتەدى. قازىرگى اعاشتاردىڭ ورنىنا قاراعايلار شىعادى. ءومىر سولاي. ودان كەيىن بۋرابايداعى ورمانداي بولىپ جايقالادى» ، - دەدى پرەزيدەنت.

ايتا كەتسەك، استانا قالاسىن جەلدەن ساقتاۋ ءۇشىن، حالىقتىڭ قولايلى كليماتتا تۇرۋىن قالىپتاستىرۋ ءۇشىن قازاقستان رەسپۋبليكاسىنىڭ پرەزيدەنتى ن. ءا. نازاربايەۆپەن 1997 -جىلدىڭ قىركۇيەگىندە جوبانى جۇزەگە اسىرۋدىڭ قيىندىعىنا قاراماستان استانا قالاسىنىڭ جاسىل بەلدەۋىن قۇرۋ تۋرالى شەشىم قابىلدانعان بولاتىن.