قازاقستاندا ورالماندار ءۇشىن ازاماتتىق الۋ جەڭىلدەيدى
مينيستر مادينا ءابىلقاسىموۆا باسقا ەلدەگى قازاقتاردىڭ وتانعا ورالۋى ەل دەموگرافياسى ۇلەس قوساتىنىن اتاپ ءوتتى، دەپ حابارلايدى Sputnik.
«شەتەلدە تۇراتىن ەتنيكالىق قازاقتارعا قازاقستانعا قونىس اۋدارۋ ءۇشىن جاعداي جاساۋ ماقساتىندا ازاماتتىق الۋدىڭ جەدەلدەتىلگەن (جەڭىلدەتىلگەن) ءتارتىبىن ەنگىزۋ قاراستىرىلىپ وتىر. سونداي- اق ولارعا قانداي دا ءبىر رۇقساتسىز جانە ورالمان مارتەبەسىنىڭ بار- جوعىنا قاراماستان جۇمىسقا ورنالاسۋ قۇقىعى ۇسىنىلادى»، -دەدى ءابىلقاسىموۆا ەسەپ بەرۋ كەزدەسۋىندە.
ميگرانتتاردى اقپاراتتىق جانە قۇقىقتىق قولداۋ ورتالىقتارى مەن ءتىل ۇيرەنۋ كۋرستارى اشىلماق. ول ورالمانداردىڭ جاڭا ورتاعا بەيىمدەلۋىنە وڭ اسەر ەتەدى.
«جىل سايىن قازاقستانعا ەڭ كەمى 20 مىڭ ورالمان كەلەدى دەپ جوسپارلاپ وتىرمىز»، - دەدى مينيستر.
«قولدانىستاعى كوشى- قون زاڭناماسى ەلىمىزدىڭ ەكونوميكالىق، الەۋمەتتىك، دەموگرافيالىق دامۋىنداعى قاجەتتىلىكتەر مەن جۇمىس بەرۋشىلەردىڭ مۇددەسىنە تولىعىمەن سايكەس كەلمەيدى. زاڭ ا شەتەلدەن ۋاقىتشا جۇمىس كۇشىن تارتۋعا باعىتتالعان جانە وندا ەڭبەك ميگرانتتارى مەن ورالمانداردى ورتاعا بەيىمدەۋ شارالارى كوزدەلمەگەن»، - دەدى ۆەدومستۆو باسشىسى.
مينيستر ءابىلقاسىموۆانىڭ ايتۋنىشا، اتالعان شارالار زاڭ جوباسىندا قارالماق.
«ەكونوميكاعا قاجەتتى شەتەلدىك جۇمىس كۇشىن تارتۋ سالاسىندا مىنالار قاراستىرىلعان: جۇمىس رۇقساتتارىن بەرۋ جۇيەسىن جەتىلدىرۋ؛ قاجەتتىلىكتى باعالاۋدىڭ ءتيىمدى تەتىكتەرىن قۇرۋ جانە شەتەلدىك جۇمىس كۇشىن تارتۋ تەتىكتەرىن جەتىلدىرۋ؛ ىسكەرلىك ماقساتتا كەلەتىن، ينۆەستيتسيالىق جانە كاسىپكەرلىك قىزمەتكە قاتىساتىن شەتەلدىك ازاماتتاردىڭ ەل اۋماعىنا كىرۋ ەرەجەلەرىن جەڭىلدەتۋ. بۇل شارالار ەل ەكونوميكاسىن جىل سايىن ەڭ كەمى 40 مىڭ بىلىكتى شەتەلدىك مامانمەن قامتۋعا مۇمكىندىك بەرەدى»، - دەدى ءابىلقاسىموۆا.