تۇركياداعى قازاق جاستارىن اقوردادا قابىلدادى
ولاردىڭ بارلىعى تۇرىك جەرىندە دۇنيەگە كەلگەن. قازىر ىستانبۇل مەن انكارانىڭ ۇزدىك ۋنيۆەرسيتەتتەرىندە ءبىلىم الىپ ءجۇر، دەپ حابارلايدى قازاقپارات ءتىلشىسى.
«جاقىندا تۇركياعا ساپارمەن بارعاندا قازاق دياسپوراسىمەن ۇلكەن كەزدەسۋ وتكىزدىم. سول كەزدە جاستار تۋعان ەلىن بىلسە ەكەن، جاقىن تانىسسا ەكەن دەپ، كەلىسكەن بولاتىنبىز. ءسويتىپ، سەندەردى كوپتەگەن جاستاردىڭ ىشىنەن ىرىكتەپ، ەڭ ءبىلىمدى، ءۇش ءتىلدى مەڭگەرگەن ۇزدىكتەردى تاڭداپ الدىق. سول جەردەگى زيالى قاۋىم ايتتى. سوندىقتان سەندەردى وسىنداي ۇلكەن جەتىستىكپەن قۇتتىقتايمىن»، - دەدى گ. ءابدىقالىقوۆا كەزدەسۋدىڭ باسىندا.
مەملەكەتتىك حاتشى جاستارمەن استانانىڭ 20 جىلدىعى قارساڭىندا كەزدەسىپ وتىرعانىن ەرەكشە اتاپ ءوتتى. ەلوردانىڭ وتاندىق ەكونوميكانىڭ قوزعاۋشى كۇشىنە اينالعانىن، مادەنيەت پەن ونەردىڭ مايەگى، عىلىم مەن جاڭاشىلدىقتىڭ ورداسى، حالىقارالىق ماڭىزى بار شارالاردىڭ وشاعى بولىپ وتىرعانىن دا جەتكىزدى. بۇگىندە رۋxاني جاڭعىرۋ، بەس الەۋمەتتىك باستاما، يندۋستريالدى- يننوۆاتسيالىق دامۋ، تسيفرلاندىرۋ جانە تاعى باسقا مەملەكەتتىك باعدارلامالار اياسىندا ۇلكەن ءىس-شارالار قولعا الىنىپ جاتىر.
«قازاقستان جەر كولەمى جاعىنان دۇنيەجۇزى بويىنشا 9-ورىندا. جەرىمىز - كەڭ-بايتاق. سوندىقتان ءبىز دياسپورامەن كەزدەسكەندە ەلگە كەلىڭىزدەر، بالالاردى جىبەرىڭىزدەر، وسى جەردە وقىسىن، وسى جەردە جۇمىس ىستەسىن، وسى جەردە قونىستانسىن دەپ، ىلعي ايتامىز»، - دەدى گ. ءابدىقالىقوۆا.
اقورداعا تۇركياداعى قازاق جاستارىنىڭ 10 وكىلى كەلدى. ولاردىڭ ىشىندە ەدىگە دوعان دا بار. اكەسى - تۇرىك. اناسى - قازاق. ءبىراق اكەسىنىڭ ناعاشى اتاسى قازاق ەكەن. بۇگىندە ەدىگە دوعان جوعارى وقۋ ورنىندا قۇقىقتانۋ بويىنشا ءبىلىم الىپ ءجۇر. «مەن ءوزىم تۇركيادا دۇنيەگە كەلدىم. انام وسكەمەن جاقتان. ءبىز جىلدا كەلىپ تۇرامىز. ال استانادا ءتورت-بەس رەت بولدىم. وسى ۋاقىتتىڭ ىشىندە قالا قاتتى وزگەردى. قازىر مەن ءتورتجىلدىق وقۋدى الىپ جاتىرمىن. سوسىن ماستەر وقۋىن تۇركيادا، ءيا بولماسا، ەۋروپادا العاننان كەيىن قازاقستانعا كەلىپ، ەڭبەك ەتۋ - ارمانىم»، - دەدى ە. دوعان جۋرناليستەرگە بەرگەن سۇحباتىندا.
نۇربانۋ قارا بولسا، تۋعان جەرىنە وسىمەن ەكىنشى رەت كەلىپ وتىر. ونىڭ ايتۋىنشا، تۇركيادا تۇراتىن قازاق جاستارى ۇنەمى ارالاسىپ تۇرادى. الايدا قازاقستانداعى جاستارمەن بايلانىس جوق. «شەتەلدەگى قازاق جاستارىنىڭ بارلىعى ەلىن-جەرىن كورسە ەكەن دەيمىن. ءبىز باقىتتىمىز. سەبەبى وتانىمىزعا كەلىپ، كورىپ ءجۇرمىز. تۇركيادا وقىعان قازاق ستۋدەنتتەرى بىزبەن بايلانىسقا شىعىپ تۇرادى. ءبىراق كوپ ەمەس»، - دەيدى ن. قارا.
ال مەملەكەتتىك حاتشى گۇلشارا ءابدىقالىقوۆا استانانى ارالاعاندا فوتوعا كوبىرەك تۇسۋگە كەڭەس بەردى. «ەندى، سەندەر نازاربايەۆ ۋنيۆەرسيتەتىندە بولدىڭىزدار. كەشە فوتولارىڭدى كوردىم. ودان بولەك، «حانشاتىر»، «بەيبىتشىلىك جانە كەلىسىم سارايى»، «استانا-وپەرا»، «ەكسپو»، «نۇر-الەم» - وسىنىڭ بارلىعى باعدارلامادا بار. كورەسىزدەر دەپ ويلايمىن. سوسىن تۇركياعا بارعاسىن بارلىق قازاقتارعا جەتكىزىپ، سۋرەتتەرىڭىزدى كورسەتىڭىزدەر. قانداي وزگەرىستەردىڭ بولىپ جاتقانىن كورسىن. سوندا قىزىعۋشىلىق بولادى. ەلگە ورالاتىن قازاقتاردىڭ سانى دا كوبەيەدى»، - دەدى گ. ءابدىقالىقوۆا.