پارا العان قىزمەتكەرى ءۇشىن باسشىسى قىزمەتىنەن كەتتى - تۇركىستان وبلىسى
بۇل تۋرالى دەپارتامەنتتىڭ باسپا ءسوز قىزمەتىنە سىلتەمە جاساپ قازاقپارات ءتىلشىسى حابارلايدى.
ا. ۇمبەتاليەۆ مەملەكەتتىك قىزمەتتە 40 جىلداي قىزمەت اتقارعان. دەگەنمەن، قاراماعىنداعى قىزمەتكەرلەرى سىبايلاس جەمقورلىققا كۇدىكتى بولىپ ىلىنگەننەن كەيىن، باسشىلىقتان ءوز ەركىمەن وڭتۇستىك قازاقستان وبلىسى بويىنشا مەملەكەتتىك كىرىستەر دەپارتامەنتى باسشىسى لاۋازىمىنان كەتۋدى سۇرادى.
ول قىزمەتىنەن كەتە وتىرىپ، قازاقستان رەسپۋبليكاسى قارجى مينيسترلىگى، مەملەكەتتىك كىرىستەر كوميتەتى، تۇركىستان وبلىسى اكىمدىگى جانە قۇقىق قورعاۋ ورگاندارىنىڭ باسشىلىعىنا وعان سەنىم بىلدىرگەنى جانە دەپارتامەنتتىڭ ۇجىمىنا العىسىن ايتتى.
ەسكە سالايىق، بيىل 15-16 -اقپاندا ەلىمىزدىڭ وڭتۇستىگىندەگى 3 وبلىس پەن الماتى قالاسىندا ارنايى اۋقىمدى وپەراتسيا جۇرگىزىلىپ، ناتيجەسىندە 35 ادام ۇستالعان بولاتىن. ولاردىڭ اراسىندا كەدەن ورگانىنىڭ، شەكارا قىزمەتىنىڭ لاۋازىمدى تۇلعالارى، بروكەرلەر، دەلدالدار، سونداي-اق ۇيىمداسقان قىلمىستىق توپ مۇشەلەرى بار. ال، وڭتۇستىك قازاقستان وبلىسى بويىنشا ۇستالعان 13 ادام قازاق- وزبەك مەملەكەتتىك شەكاراسىنداعى «سارىاعاش»، «قازىعۇرت»، «اتامەكەن»، «قاپلانبەك» شەكارا بەكەتتەرىنىڭ قىزمەتكەرلەرى بولعان. ۇستالعان 13 كۇدىكتىگە «پارا الۋ» بابى بويىنشا ايىپ تاعىلىپ، ۇشەۋى «پارا الۋعا كومەكتەسۋ» بويىنشا ۇستالدى. ولارعا ەكى ايعا ۋاقىتشا تەرگەۋ اباقتىسىنا قاماۋعا الۋ تۋرالى سانكتسيا بەرىلگەن بولاتىن.
سىبايلاس جەمقورلىققا قارسى ءىس-قيمىل ۇلتتىق بيۋروسى 2018 -جىلدىڭ 2 -ماۋسىمىندا وڭتۇستىك قازاقستان وبلىسى بويىنشا مەملەكەتتىك كىرىستەر دەپارتامەنتى باسشىسىنىڭ ورىنباسارى نۇرجان تەڭلىبايەۆتى ۇستادى. ول قىلمىستىق جوسپاردى ۇيىمداستىرىپ، وزىنە باعىنىشتى ءتورت كەدەندىك بەكەتتىڭ باسشىلارىن قىلمىسقا تارتقان.
سىرتقى ەكونوميكالىق قىزمەتتەگى جالپى قامقورلىعى ءۇشىن كاسىپكەرلەردەن جۇيەلى تۇردە پارا الۋدى ۇيىمداستىرعان. ۇلتتىق بيۋرو مالىمەتى بويىنشا، 2017-2018 -جىلدار ارالىعىندا الىنعان زاڭسىز سىياقىنىڭ كولەمى 1,2 ميلليون ا ق ش دوللارىن قۇراعان.