مەملەكەتتىك «بولاشاق» باعدارلاماسىندا قاي ماماندىقتارعا باسىمدىق بەرىلەدى

استانا. قازاقپارات - الداعى ۋاقىتتا «بولاشاق» باعدارلاماسى بويىنشا ماماندىقتاردىڭ ءتىزىمى قىسقارتىلمايدى. دەگەنمەن، ناقتى بىرنەشە باعىتقا باسىمدىق بەرىلەدى، دەپ حابارلايدى قازاقپارات ءتىلشىسى.

«حالىقارالىق باعدارلامالار ورتالىعى» ا ق باسشىسى جانبولات مەلدەشوۆتىڭ ايتۋىنشا، بۇگىندە «بولاشاق» باعدارلاماسىندا 100-دەن استام ماماندىق بار.

«الايدا قازىرگى زامان تالابىنا قاجەتتى ماماندىق ول IT (اقپاراتتىق تەحنولوگيالار) بولىپ تابىلادى. سوسىن كيبەرقاۋىپسىزدىك، نەونتولوگيا مەن ارحيتەكتۋرا بار. وسىنداي ماماندىقتارعا سۇرانىس كوپ. بۇدان بولەك، بۇگىندە «استانا» حالىقارالىق قارجى ورتالىعىنىڭ اشىلىپ جاتقانىن ءبارىمىز جاقسى بىلەمىز. سول جەرگە حالىقارالىق قارجى مەن قارجى تەحنولوگيالارى بويىنشا ماماندار قاجەت. سوندىقتان وسى ماماندىقتارعا باسىمدىق بەرىلەدى»، - دەدى ج. مەلدەشوۆ ۇكىمەت ۇيىندە وتكەن باسپا ءسوز ءماسليحاتىندا.

ونىڭ ايتۋىنشا، بۇگىندە «بولاشاق» باعدارلاماسى تۇلەكتەرىنىڭ 85 پروتسەنتى استانا مەن الماتى قالالارىندا جۇمىس ىستەيدى. قالعان 15 پروتسەنتى وڭىرلەردە ەڭبەك ەتىپ ءجۇر.

«تۇلەكتەردى ايماقتارعا تارتۋ ءۇشىن باعدارلامانى وتەۋ مەزىمىن ءۇش جىلعا قىسقارتىپ وتىرمىز. ال ءبىلىم سالاسىندا جۇمىس ىستەسە، ەكى جىلعا قىسقارتىلادى»، - دەپ اتاپ كورسەتتى ج. مەلدەشوۆ.

ايتا كەتەيىك، الداعى بەس جىلدا «بولاشاق» باعدارلاماسىنا ءبىرقاتار وزگەرىستەر ەنگىزىلەدى. اتاپ ايتقاندا، كۆوتالىق كاتەگوريالاردى الىپ تاستاۋ جوسپارلانعان.

ق ر ءبىلىم جانە عىلىم ۆيتسە-ءمينيسترى تالعات ەشەنقۇلوۆتىڭ ايتۋىنشا، باستى وزگەرىستەردىڭ ءبىرى - اعىلشىن تىلىنە قاتىستى تالاپتى كۇشەيتۋ. وسىعان بايلانىستى بارلىعىنا بىردەي تالاپ قويىلادى.

«ءبىز ءبىر جەردە تۇرا المايمىز. سەبەبى بىلىمگە قاتىستى تالاپتار كۇشەيىپ كەلەدى. سوندىقتان الداعى بەس جىلدا «بولاشاق» باعدارلاماسىنا ءبىرقاتار ماڭىزدى وزگەرىستەر ەنگىزىلەدى. نەگىزگى ماقسات - باعدارلامانىڭ تيىمدىلىگىن ارتتىرۋ. بىرىنشىدەن، ايماقتىق دەڭگەيدە ونلاين تەستىلەۋ بولادى. وسىنىڭ ارقاسىندا كونكۋرسقا قاتىسۋ كورسەتكىشى ارتادى دەگەن بولجام بار. ەكىنشىدەن، ۇمىتكەرلەردى ساپالى تۇردە ىرىكتەۋ ماقساتىندا اعىلشىن تىلىنە قاتىستى تالاپتار كۇشەيتىلەدى. اتاپ ايتقاندا، ماگيستراتۋراعا تۇسەمىن دەۋشىلەر ءۇشىن IELTS- ءتىڭ مەجەسى 6,1-گە دەيىن كوتەرىلەدى. ۇشىنشىدەن، اعىلشىن تىلىنە قاتىستى تالاپتاردىڭ كۇشەيتىلۋىنە بايلانىستى 2025 -جىلدان باستاپ بارلىق كۆوتالىق كاتەگوريالاردى الىپ تاستايتىن بولامىز»، - دەيدى ت. ەشەنقۇلوۆ.