اقمولا وبلىسىندا وقۋشىنى سوققىعا جىققان بۇرىنعى اكىمگە ايىپپۇل سالىندى
قورعالجىن اۋداندىق سوتىنىڭ قاۋلىسىمەن 8-سىنىپ وقۋشىسى دياس مۇقاندى سوققىعا جىقتى دەپ ايىپتالعان اۋىلدىق وكرۋگتىڭ بۇرىنعى اكىمى جانات وماروۆ ق ر اكىمشىلىك قۇقىقبۇزۋشىلىق تۋرالى كودەكسىنىڭ 73-1-بابى، 1-بولىگىندە («دەنساۋلىقتىڭ قىسقا مەرزىمگە بۇزىلۋىنا نەمەسە جالپى ەڭبەك قابىلەتىن تۇراقتى تۇردە بولماشى جوعالتۋعا اكەپ سوققان، دەنساۋلىققا قاساقانا جەڭىل زيان كەلتىرۋ») كورسەتىلگەن اكىمشىلىك قۇقىقبۇزۋشىلىقتى جاسادى دەپ تانىلدى.
«وعان 15 ا ە ك (1 ا ە ك - 2405 تەڭگە) مولشەرىندە ايىپپۇل سالىندى. قاۋلى زاڭدى كۇشىنە ەنگەن جوق. تاراپتار وعان 10 كۇن ىشىندە جازباشا شاعىمدانۋىنا بولادى»، - دەپ مالىمدەدى اقمولا وبلىستىق سوتىنىڭ باسپا ءسوز قىزمەتى.
ەسكە سالا كەتەيىك، اقمولا وبلىسىندا 8-سىنىپ وقۋشىسىن سوققىعا جىققان قورعالجىن اۋىلدىق وكرۋگىنىڭ اكىمى جانات وماروۆتىڭ ۇستىنەن ءىس قوزعالعان بولاتىن.
دارىگەرلەر بالانىڭ دياگنوزى تۋرالى: «مي شايقالعان، يىق بۋىندارى مەن بەلدىڭ جۇمساق ءتىنى جارالانعان، بەس اۋماعى جارالانعان. قازىرگى ۋاقىتتا بالانىڭ جاعدايى ورتاشا-كۇردەلى، ومىرىنە ەشتەڭە قاۋىپ ءتوندىرىپ تۇرعان جوق. توموگرافيا قورىتىندىسىنا سايكەس، باس ميى جاعىنان قان قۇيىلۋى نەمەسە جاراقات الۋ جاعدايى جوق»، - دەگەن بولاتىن.
اقمولا وبلىستىق ءى ءى د باسپا ءسوز قىزمەتىنىڭ مالىمدەۋىنشە، بالانىڭ دەنساۋلىعىنا جەڭىل زيان كەلتىرىلگەن. 2017 -جىلى «دەنساۋلىققا قاساقانا جەڭىل زيان كەلتىرۋ» بابى قىلمىستىق باپ قاتارىنان الىنىپ، اكىمشىلىك قۇقىقبۇزۋشىلىقتار قاتارىنا جاتقىزىلعان بولاتىن. سوندىقتان بۇرىنعى اكىمگە قاتىستى قىلمىستىق ءىس توقتاتىلىپ، ق ر اكىمشىلىك قۇقىقبۇزۋشىلىق تۋرالى كودەكسىنىڭ 73-1-بابىنىڭ 1-بولىگىنە سايكەس اكىمشىلىك حاتتاما تولتىرىلعان.