شەت تىلدەرىن باستاۋىشتان كەيىن وقىتۋ كەرەك - سەنات ءتوراعاسى

None
None
 استانا. قازاقپارات - كەشە، 25 -ماۋسىمدا «قازاق ءۇنى» ۇلتتىق پورتالىندا جازعانىمىزداي، بيىل دا جۋرناليستەردى كاسىپتىك مەرەكەسىمەن ەلدىڭ ەڭ الدىمەن سەنات ءتوراعاسى قاسىم- جومارت توقايەۆ قۇتتىقتادى.

بايلانىس جانە اقپارات سالاسى قىزمەتكەرلەرىنىڭ مەرەكەسىنە وراي پارلامەنت سەناتىنىڭ ءتوراعاسى قاسىم- جومارت توقايەۆ باق باسشىلارىن قابىلداپ، ماراپاتتادى.

جيىن الدىندا سەناتتىڭ باسپا ءسوز حاتشىسى، بەلگىلى جۋرناليست ادىلبەك قابا جۋرناليستەردى سەناتتاعى جۇمىس تارتىبىمەن تانىستىردى.

رەسمي جيىن بىتكەسىن جۋرناليستەر قۇرمەتىنە ارنالعان داستارحان باسىندا سەنات ءتوراعاسى قاسىم- جومارت توقايەۆپەن ەمەن-جارقىن اڭگىمەلەستىك. ونەر شەبەرلەرىنىڭ كونسەرتىن تاماشالادىق.

داستارحان باسىندا ءبىر ۇستەلدە وتىرعان جۋرناليستەرمەن اڭگىمە ۇستىندە قاسىم-جومارت كەمەل ۇلى: «جاس كەزىمدە جۋرناليست بولۋدى ارمانداعان ەدىم. ءبىراق، ءساتى تۇسپەي، كەيىن ماسكەۋدىڭ حالىقارالىق ۋنيۆەرسيتەتىنە ءتۇستىم» دەپ، ايتىپ قالدى.

- ارينە، اكەڭىز كەمەل توقايەۆ بەلگىلى جازۋشى بولعاسىن، جۋرناليست بولۋدى ارمانداۋىڭىز زاڭدىلىق قوي -  دەپ، مەن دە ءسوز قوسىپ قويدىم.

- ءسىز قازىر دە جۋرناليستەردەي ماقالالار جازىپ ءجۇرسىز عوي، - دەدى «ەگەمەن قازاقستان» گازەتى باسشىسى دارحان قىدىرالى.

- ءيا، الدىما دايىنداپ اكەلگەن ماتىندەردى كوبىنەسە، ۇناتپاي، ءوزىم جازۋعا تىرىسامىن» - دەدى سەنات ءتوراعاسى.

- ءبىز، جۋرناليستەر قازىر ءسىزدىڭ تۆيتتەردەگى جازباڭىزدى اڭدىپ وتىرامىز، - دەدى «ايقىن» گازەتى باس رەداكتورى نۇرتورە ءجۇسىپ.

اڭگىمە ق. توقايەۆتىڭ تۆيتتەردەگى ءبىرىنشى سىنىپتا اعىلشىن ءتىلىن ەمەس، قازاق ءتىلىن وقىتۋ كەرەكتىگى تۋرالى، ەل جاپپاي قولداپ جاتقان قۇندى كەڭەسىنە كەلگەندە سەنات ءتوراعاسى:

- اعىلشىن ءتىلىن، جالپى شەت تىلدەردى باستاۋىشتان كەيىن، 5- سىنىپتان باستاپ وقىتۋ كەرەك. ءبىز ءوزىمىز سولاي وقىدىق قوي، - دەپ كەلىستى جىميىپ قويدى.

- جاراتىلىس تانۋ پاندەرىن، فيزيكا، ماتەماتيكا پاندەرىن اعىلشىن تىلىندە وقىتۋ دەگەن قالاي بولادى؟ وعان دايىن مۇعالىمدەر بار ما؟ - دەپ ريتوريكالىق سۇراۋلى جۇزبەن قارادى بىزگە.

- ءبىلىم ءمينيسترى ساعاديەۆتىڭ «اعىلشىن تىلىندە ساباق بەرەتىن مۇعالىمدەردىڭ بارلىعى دايىن تۇر» دەپ زۋىلداۋىنىڭ ءبارى وتىرىك. كەشە اۋىلدان كەلگەن مۇعالىمدەر «اعىلشىن تىلىندە ساباق بەرۋ قازىر مۇمكىن ەمەس، بوسقا حالىق قارجىسىن شاشۋ، ەرتەڭ بالالارىمىز ءدۇبارا بولىپ، قاتتى زاردابىن تارتامىز» دەپ زار جىلاپ كەتتى، - دەدىم مەن.

اڭگىمە اراسىندا قاسىم-جومارت كەمەل ۇلى «قازاق ءۇنى» سايتىنداعى «توقايەۆتىڭ توقەتەر ءسوزىن تۇسىنبەيتىن دەپۋتاتتار دا بار ەكەن» دەگەن ماقالامىزدى وقىعاندىعىن ايتىپ، راحمەتىن ءبىلدىردى. مەن ۇكىمەت ايتسا، ۇندەمەۋ، مينيستر نە دەسە دە مىڭق ەتپەۋدى مەڭگەرگەن دەپۋتاتتارعا سالسا، اعىلشىن ءتىلىن بالاباقشادان باستايىق دەپ شىعادى عوي دەپ، كەيبىر «حالىق قالاۋلىلارىن» دا تۇيرەپ ءوتتىم اراسىندا...

ءيا، كەزىندە شەت ءتىلىن 5- سىنىپتان باستاپ وقىپ-اق، كەيىن بىرىككەن ۇلتتار ۇيىمى ءتوراعاسىنىڭ ورىنباسارلىعىنا دەيىن كوتەرىلگەن، الەم مىنبەرىندە اعىلشىنشا تالاي سويلەپ جۇرگەن سەنات ءتوراعاسى قاسىم-جومارت توقايەۆتىڭ تۇلعاسى - ءوزى ايتقانداي، بالاعا شەت ءتىلىن باستاۋىشتان كەيىن وقىتۋ - تالقىلاۋسىز تاڭداۋ، ومىرلىك وزەكتى قاعيدا ەكەنىن انىق بىلدىرمەي مە؟

«ونى بىلەتىن بالا بار ما؟» دەگەندەي، ساعاديەۆتىڭ ساناسىن مۇلدەم باسقا «الەم» بيلەپ تۇرسا، نە ىستەمەكپىز؟

كەشە عانا «قازاق ءۇنى» سايتىندا سەناتور مۇرات باقتيار ۇلى دا ەكى اۋىز ساراپتاماسىمەن-اق ەستىنىڭ ەستىر قۇلاعىنا ۇعىمدى جازبا جاريالادى.

«الەمنىڭ بىردە-ءبىر ەلىندە ءۇش ءتىل مۇلدەم وقىتىلمايدى ەكەن. باستاۋىش كلاستاردا بارلىق پاندەر تەك انا تىلىندە وقىتىلۋ كەرەك ەكەنىن مينيسترلىككە ۇنەمى ايتىپ كەلەمىز. «ءوزىڭ بىلمە، بىلگەننىڭ ءتىلىن الما» دەگەن قاعيداتتى مينيسترلىك بەرىك ۇستانعان سياقتى. تاۋسىلمايتىن، اياعىنا دەيىن جەتىلمەگەن رەفورمالاردىڭ جەتەگىندە كەتىپ بارا جاتىرمىز. وسىنىڭ سالدارىن ون، ون بەس جىل وتكەننەن كەيىن تارتپاساق جارار ەدى، - دەپ، دابىل قاعادى سەناتور...

ەلدىڭ زارى ەلباسىعا جەتەر مە؟!.



قازىبەك يسا

Qazaquni.kz

 

سوڭعى جاڭالىقتار