قىزىلوردادا تۇرعىن ۇيدەن كونە قىلىش تابىلدى

قىزىلوردا. قازاقپارات - قىزىلوردا وبلىسى شيەلى اۋدانىنىڭ ورتالىعىندا كونە زاماننان سىر شەرتەتىن قىلىش تابىلدى، دەپ حابارلايدى قازاقپارات ءتىلشىسى.

اۋدان ورتالىعى تۇرعىنىنىڭ ءبىرى ءوز اۋلاسىنا قۇرىلىس جۇمىستارىن جۇرگىزۋ ماقساتىندا ارنايى تەحنيكا شاقىرتادى. تەحنيكامەن جەردى قازۋ بارىسىندا ءۇش مەتردەي جەردەن قىلىش ۇلگىسىندەگى جادىگەر تابىلادى. قىلىش جارتىلاي شىرىگەن كۇيدە ەكەن.

تاريحي قۇندىلىقتى باعالاي بىلگەن ازامات دەرەۋ اۋداندىق ولكەتانۋ مۋزەيىنىڭ ديرەكتورى وسەربەك تورەبايدى شاقىرتادى. مامانداردىڭ ايتۋىنشا، بۇل جايىندا ازىرگە تولىق جورامال جاساۋعا ەرتەرەك.

«مۇنداي جادىگەرلەر تولىق تەكسەرۋدەن وتەدى. سودان كەيىن عانا ناقتى شەشىم قابىلداي الامىز. ازىرگە بۇل باعىتتا ساراپتاما جۇمىسىن جۇرگىزەتىن بولامىز»، - دەيدى ءو. تورەباي.

قىلىشتىڭ جاسالۋ مەرزىمى 2-3- عاسىرعا سوزىلۋى مۇمكىن. ودان دا ارعى كەزەڭدى قامتۋى دا عاجاپ ەمەس.

تاريحي جادىگەرلەردى زەردەلەپ جۇرەتىن جەرگىلىكتى جۋرناليست نۇربولات پىرىمبەتتىڭ ايتۋىنشا، قىلىش قازاقتىڭ ەسكى سوعىس قارۋىنىڭ ءبىرى بولۋى ىقتيمال. زەرتتەۋشىلەر ونى مەكسيكالىق ماچەتەگە وتە ۇقساس ەكەنىن ايتادى.