باتۋميدە قازاق كۇرەسىنەن ەۋروپاداعى ۇزدىك پالۋان انىقتالدى

باتۋمي. قازاقپارات - گرۋزيانىڭ باتۋمي قالاسىندا قازاق كۇرەسىنەن ءبىرىنشى ەۋروپا چەمپيوناتى اياقتالدى، دەپ حابارلايدى قازاقپارات ءتىلشىسى.

كۇرەسكە ەۋروپا ەلدەرىنىڭ 80-گە جۋىق سپورتشىسى قاتىستى. جارىس سەگىز سالماق دارەجەسى، سونداي-اق ابسوليۋتتى سالماق دارەجەسى بويىنشا ءوتتى.

 

«مەنىڭ قارسىلاستارىم مىقتى بولدى. جەڭۋ وڭاي بولمايدى، ءبىراق چەمپيوناتتىڭ ءوز ەلىمدە ءوتىپ جاتقانى كومەكتەستى. قازاق كۇرەسىنە ءبىر جىلداي دايىندالدىم. ءوزىم دزيۋدوشىمىن. قيىن بولدى، الايدا مەن ءداستۇر مەن قازاق كۇرەسىنىڭ ەرەجەلەرىنە سايكەس كۇرەستىم. سپورتتىق مانسابىمدى قازاقتارمەن بىرگە جالعاستىرماقپىن. مۇنداي دەڭگەيدەگى العاشقى جارىسىم. ءبىر اي بۇرىن قازاق كۇرەسىنەن گرۋزيا چەمپيوناتى ءوتتى، وندا مەن گرۋزيا چەمپيونى اتاندىم»، - دەدى جۋرناليستەرگە 60 كەلىگە دەيىنگى سالماق دارەجەسىندەگى چەمپيونات جەڭىمپازى يراكلي كۋپاتادزە.

باستى كۇرەس جەرگىلىكتى ۋاقىت بويىنشا ءتۇن ورتاسىنا قاراي ءابسوليۋتتى سالماق دارەجەسىنەن ءوتتى. پالۋانداردىڭ كۇرەسىن تاماشالاۋعا فۋتبولدان الەم چەمپيوناتىندا گەرمانيا نەمەسە شۆەتسياعا جانكۇيەر بولۋعا كەلگەن ادامداردان الدەقايدا كوپ كورەرمەن جينالدى.

اتالعان سالماق دارەجەسىندە گرۋزيالىق پالۋان، دزيۋدودان ەۋروپا چەمپيونى گۋرام تۋشيشۆيلي جەڭىمپاز اتاندى. ەكىنشى ورىندى بولگارلىق ۆەسەلين يۆانوۆ، ءۇشىنشى ورىندى پولياك پەتر توماش تالاچ يەلەندى.

«وسى چەمپيوناتقا قاتىسۋ مەن ءۇشىن ۇلكەن مارتەبە. بىلتىر قازاقستاندا ەكىنشى ورىن العان ەدىم. ول ماعان ۇلكەن تاجىريبە بولدى. مەن جاقسى كۇرەستىم دەپ ويلايمىن، سەبەبى ءبىزدىڭ گرۋزيندىك كۇرەس پەن قازاق كۇرەسى قاتتى ۇقسايدى. سونىڭ ارقاسىندا چەمپيون بولدىم دەگەن ويدامىن» ، - دەدى گۋرام تۋشيشۆيلي جۋرناليستەرگە بەرگەن سۇحباتىندا.