كەڭەس عارىشكەرلەرى الاكول كۋرورتتىق ايماعىنا كەلدى

استانا. قازاقپارات - شارا ەلباسىنىڭ الاكولدى دامىتۋ بويىنشا تاپسىرماسىن ورىنداۋ اياسىندا كۋرورتتىق ايماققا ىشكى جانە رەسەيلىك تۋريستەردىڭ لەگىن ارتتىرۋ ماقساتىندا وتكىزىلىپ وتىر، دەپ حابارلايدى قازاقپارات ءتىلشىسى.

ق ر مادەنيەت جانە سپورت مينيسترلىگى مەن «Kazakh Tourism» ۇلتتىق كومپانياسى شاقىرۋىمەن ءىس-شاراعا قازاقستاننىڭ حالىق قاھارمانى، اۆياتسيا گەنەرال-لەيتەنانتى تالعات مۇسابايەۆ، كەڭەس عارىشكەرى، كەڭەس وداعىنىڭ باتىرى اناتوليي ارسەبارسكي، قازاقستان جانە رەسەي عارىشكەرى، پولكوۆنيك، قازاقستاننىڭ حالىق قاھارمانى جانە رەسەي فەدەراتسياسىنىڭ قاھارمانى يۋريي مالەنچەنكو، رەسەي فەدەراتسياسىنىڭ عارىشكەرى يۋري باتۋرين قاتىسۋدا.

«الاكولدىڭ سۋىن قازاقتىڭ باتىرلارى ەرتە زاماننان بەرى جوڭعارلارمەن شايقاستان كەيىن ەمدەلۋ ءۇشىن قولدانعان دەگەن اڭىز بار. كەيبىرىنىڭ ايتۋىنشا، وسى ايماقتا السىرەگەن جانە جاراقاتتانعان جاۋىنگەرلەرىن ەمدەۋ ءۇشىن شىڭعىس حان تۇمەندەرىمەن كەلىپ وتىرعان. وسى اڭىزداردىڭ بارلىعىن كەڭەس عارىشكەرلەرىنىڭ عارىش رادياتسياسىنان تازارۋ مەن ساپاردان كەيىنگى مەديتسينالىق قايتا قالپىنا كەلتىرۋ كەزەڭدەرىنىڭ ءبىرىن الاكولدە وتكىزگەنى تۋرالى تاريحي دەرەكتەر راستايدى دەسە بولادى»، - دەيدى ق ر مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ ءتورايىمى ماينيۋرا مۋرزاماديەۆا.

ەرتەدە عارىشقا ساپاردان كەيىنگى قايتا قالپىنا كەلتىرۋ شارالارى كولدىڭ شىعىس جاعالاۋىندا وتكىزىلگەنى بەلگىلى. ءبىراق، وسى جولى ۇيىمداستىرۋشىلار عارىش ارداگەرلەرىنە كولدىڭ وڭتۇستىك جاعالاۋىن كورسەتۋدە.

عارىشكەرلەردىڭ باعدارلاماسى ساۋىقتىرۋ پروتسەدۋرالارىن، سپا جانە بەلسەندى دەمالىس تۇرلەرىن قامتيدى.

عارىشكەرلەردىڭ ايتۋىنشا شيپاجايلىق- كۋرورتتىق ساۋىقتىرۋ ولاردىڭ كاسىبي قىزمەتىن جالعاستىرۋ ءۇشىن قاجەتتى جانە عارىش ساپارىنان كەيىنگى قالپىنا كەلۋدىڭ قورىتىندى كەزەڭى بولىپ تابىلادى.