ۇلتتىق اسپاپ دومبىراعا ەڭ العاشقى ەسكەرتكىش اقتوبەدە قويىلدى
اقتوبە قالاسىنداعى ءابىلقايىر حان مەن ءاليا مولداعۇلوۆا كوشەلەرىنىڭ قيىلىسىنا 2016 -جىلى دومبىرا ەسكەرتكىشى قويىلدى. سودان بەرى ۇلتتىق اسپاپقا قويىلعان ەسكەرتكىش قالا تۇرعىندارى مەن قوناقتاردىڭ ءجيى سۋرەتكە تۇسەتىن ورنىنا اينالدى. ءارى شەتەلدىك تۋريستەر ءۇشىن دە دومبىرانىڭ ەسكەرتكىشى ءجيى كورسەتىلىپ، تانىستىرىلادى.
قازاقستاندا ەڭ العاشقى دومبىرا ەسكەرتكىشىن شەبەر قۋاتبەك ەشانوۆ جاساپ شىقتى. كۇن مەن جەلگە ءتوزىمدى، تابيعي اپاتقا توتەپ بەرەتىن بەرىك ەسكەرتكىش جاساۋدى ۇسىنعان كەزدە شەبەر بىردەن ماكەتىن سىزىپ، ونى فاكسپەن جولداعان. ءبارى دە كۇتپەگەن جەردەن، ەكىجاقتى ءتيىمدى ءارى ۇلتتىق ماڭىزى باسىم شەشىم بولدى. قۋات- بەك ەشانوۆ ومىرىندەگى سالماقتى تاپسىرىستى بىردەن قابىلداپ، ءبارىن ءوزى جاساپ شىققان.
«2016 -جىلدىڭ 26 -اقپانى كۇنى ماعان قالالىق اكىمدىكتەن تەلەفون شالىپ، دومبىرا ەسكەرتكىشىن جاساۋ تۋرالى ۇسىنىس ايتتى. مەن ۇسىنىستى قابىلداپ، نەگىزگى جۇمىسىمدا ءجۇرىپ ەسكيزىن سىزىپ بەردىم. ول كەزدە فاكسپەن جىبەرگەن ەدىم، سوندىقتان سىزبا ەلەكتروندى بولماعان سوڭ، جارامادى. اكىمدىك كومپيۋتەرگە ءتۇسىرىپ بەرۋىن وتىنگەنىمەن، مەن تەك قاعاز جۇزىندە ۇسىنا الاتىنىمدى جەتكىزدىم. كوپ ۇزاماي جوبا قابىلدانىپ، 22 -ناۋرىزعا تاپسىرۋدى سۇرادى. بار بولعانى 20 كۇندە تاپسىرۋعا شەشىم قابىلدادىم. ءسويتىپ كەنجە ءىنىم تولەبيدى كومەككە شاقىرىپ الدىم»، - دەدى شەبەر قۋاتبەك ەشانوۆ.
دومبىرانى جاساۋعا قاجەتتى قۇرال- جابدىقتىڭ ءبارى تەمىر ساتاتىن دۇكەندەردەن الىندى. دومبىرانى بەكىتەتىن 3 مەترلىك قۇبىر دا بازاردان تاڭدالدى.
«دومبىرا ەسكەرتكىشىنىڭ بيىكتىگى - 6 مەتر 30 سانتيمەتر. 12 پەرنەسى بار، قوس ىشەگى تروس سىمنان جاسالدى. ال دومبىرانىڭ ءوزى كولىككە ارنالعان بوياۋمەن سىرلاندى. بىزگە جەل سوققاندا قۇلامايتىن، بەرىك بولسىن دەپ تاپسىرما بەردى. سوندىقتان جەر استىنا 1,5 مەتر، تاعى 1,5 مەتر قۇبىر دومبىرا تۇعىرى مەن ىشىنە جىبەرىلدى. كەيىن ەسكەرتكىشتى قوندىراتىن تۇعىر جاساۋعا كوشتىك. بارلىعى ءۇش ءتۇرلى تۇعىر جاسالدى. دومبىرا جەرگە بەكىتىلىپ، ادامداردىڭ جانىنا بارىپ تۇرۋىنا جاعداي جاساۋدى كوزدەگەن ەدىم. قۇپتاماعان سوڭ اعاش پەن تەمىردەن التى قىرلى، ويۋلى تۇعىر دايىندالدى. وعان دا رۇقسات بەرمەي، قازىرگى قالپىن قابىلدادىق. كىرپىشپەن قالانىپ، قىش تاسپەن كوركەمدەلدى. ەندى بۇل جەرگە اقىن ءقادىر مىرزا ءالىنىڭ «ناعىز قازاق قازاق ەمەس، ناعىز قازاق - دومبىرا!» دەگەن ءسوزىن جازىپ قويعان دۇرىس سياقتى. سول كەزدە ەسكەرتكىشتىڭ بار بولمىسى اشىلىپ، ارلەنە تۇسەدى»، - دەيدى اۆتور.
قۋاتبەك ەشانوۆ بۇل جەردەن كۇندە وتەدى. جۇمىسقا بارىپ، كەلەر كەزدە كوز قيىعىن سالسا، اندا- ساندا ارنايى كەلىپ تۇرادى. العاشىندا دومبىرا- پاتي شاراسى ءجيى ۇيىمداستىرىلىپ، كەيىن بۇل ءۇردىس كىلت توقتاپ قالعان.
«دومبىرا ەسكەرتكىشىنىڭ ماڭى قايتا جاراقتاندىرىلىپ، جارىقشامدار قويىلدى. ەندى ەسكەرتكىش ماڭىنا كۇي ويناتىپ قويسا دەگەن تىلەگىم بار. كۇي ادام ساناسىن جاڭعىرتۋعا ءوز سەپتىگىن تيگىزەر ەدى. ءار ادام قاناتتانىپ، رۋحتانىپ جۇمىسقا، ساباققا بارسا، كەلىپ تىنىعىپ كۇي تىڭداسا دەيمىن. مەن دومبىرا تارتپايمىن، ءبىراق اكەم تارتقان، اعا، ءىنىم دومبىرا شەرتۋدى بىلەدى»، - دەدى شەبەر.
قۋاتبەك ەشانوۆتىڭ اتاسى ءدارىباي ۇستا بولعان. ونىڭ قايدا جەرلەنگەنى بەلگىسىز. سەبەبى، تەمىر ۇستاسىن رەسەيدىڭ زاۋىتىنا جۇمىسقا الىپ كەتىپ، سوعىس جىلدارى ءىز-ءتۇزسىز جوعالعان.
«قالالارعا قازاقتىڭ ۇلتتىق بولمىسىن كورسەتىپ، رۋحىن كوتەرىپ تۇراتىن ەسكەرتكىش قويعان دۇرىس. بىزگە شەتەلدىك اتريبۋتتاردى ەنگىزۋدىڭ قاجەتى جوق. شەتەلدىكتەر كەلسە دە، قازاقتىڭ ءوز ەرەكشەلىگىن ىزدەپ كەلەدى. ال بىزدەگى ەۋروپالىق زاتتار ولار ءۇشىن تاڭسىق ەمەس. سوندىقتان ۇلتتىق ناقىشقا باسىمدىق بەرۋ كەرەك. ماسەلەن، بەسىك. قازاق بەسىكتىڭ كيەسى بار ەكەنىن بىلەدى. بەسىك، ونىڭ قۇرال-جابدىقتارىن تۇگەل جاساپ، اينالىپ تۇراتىنداي كوركەم ەتىپ قويساق، ءبارى قىزىعادى. سول سياقتى ەر-تۇرمانعا دا جاقسى رەڭك بەرۋگە بولادى. نيەت بولسا، شەبەرلەرگە تاپسىرىس بەرسە، كەز كەلگەن قالانى قازاقتىڭ ۇلتتىق اتريبۋتىنا تولتىرار ەدى»، - دەدى ق. ەشانوۆ.
ايتا كەتەيىك، شەبەر قازىر اقتوبە فەرروقورىتپا زاۋىتىندا جۇمىس ىستەيدى. ەگەر تاپسىرىس تۇسسە بىرنەشە تۋىندىنىڭ ۇلگىسىن دايىنداپ، قالانىڭ باس جوسپارىنا سايى ەرەكشە ەسكەرتكىشتەر ۇسىنۋعا ءازىر.